ئەمڕۆ پێنجشەممە، 30-4-2026، موجتەبا خامنەیی، ڕێبەری ئێران، پەیامێکی سەبارەت بە گۆڕانکاری لە شێوازی بەڕێوەبردنی گەرووی هورمز بڵاوکردەوە و ڕایگەیاند، “بەڕێوەبەرایەتییەکی نوێ” بۆ گەرووەکە دادەمەزرێنن کە ئامانج لێی هێنانەدی “ئارامی و دەستکەوتی ئابوورییە” بۆ ناوچەکە، ئەم هەنگاوەی ئێران لە کاتێکدایە کە گرژییەکان لەگەڵ ئەمریکا گەیشتوونەتە ئاستێکی بەرز.
خامنەیی لە پەیامەکەیدا لە ڕۆژی نیشتمانی کەنداوی فارس گوتی: وڵاتەکەی ئامادەیە بۆ دابینکردنی ئاسایشی ناوچەی کەنداو، هەروەها بوونی هێزەکانی ئەمریکای بە هۆکاری سەرەکی ناجێگیری و نەبوونی ئاسایش لە ناوچەکە وەسف کرد و ڕایگەیاند، جێگیربوونی هێزە ئەمریکییەکان لە وڵاتانی کەناراوەکانی کەنداو، سەرچاوەی سەرەکی گرژییەکانە.
ڕێبەری ئێران ئاماژەی بەوەش کرد کە “وەرزێکی نوێ لە کەنداو و گەرووی هورمز خەریکە دەست پێ دەکات” و جەختی کردەوە کە ئێران و دراوسێکانی خاوەن چارەنووسێکی هاوبەشن. گوتیشی: “ئێران کار بۆ پاراستنی ئاسایشی کەنداو و کۆتاییهێنان بە پێشێلکارییەکانی دوژمن لەو ڕێڕەوە ئاوییەدا دەکات.”
بە گوتەی خامنەیی، ئەم بەڕێوەبەرایەتییە نوێیە نەک تەنیا ئارامی، بەڵکو پێشکەوتن و سوودی ئابووری بۆ هەموو وڵاتانی کەنداو دەبێت و داهاتووی ناوچەکەش بەبێ بوونی ئەمریکا وێنا کرد.
هاوکات لەگەڵ ئەم لێدوانانە، سوپای پاسدارانی ئێران بە بۆنەی “ڕۆژی نیشتمانیی کەنداوی فارس” بەیاننامەیەکی بڵاوکردەوە و تێیدا جەختی کردەوە کە ئاسایشی کەنداو تەنیا لە ڕێگەی هاوکاری وڵاتانی ناوچەکە و دوورکەوتنەوەی هێزە بیانییەکان بەدی دێت. سوپای پاسداران کەنداو بە “شا دەماری ئابووری، وزە و پەیوەندییەکان” ناوبرد و داوای کرد بە “حیکمەتی بەکۆمەڵ” ئاسایشی بەردەوام دابین بکرێت.