وەزارەتی بەرگریی ئیسرائیل ڕایگەیاند لێژنەیەکی وەزاری ڕەزامەندیی لەسەر کڕینی دوو سکوادرانی نوێی فڕۆکەی جەنگی، کە فڕۆکەکانی ئێف-٣٥ و ئێف-١٥ لە خۆ دەگرێت، لە کۆمپانیا ئەمریکایییەکانی لۆکهید مارتن و بۆینگ دەربڕی. بە گوێرەی ڕاگەیەندراوی ئەم وەزارەتە، بەهای ئەم گرێبەستە بە چەندین ملیار شیکڵ دەخەمڵێنرێت.
ئیسرائیل کاتس، وەزیری بەرگریی ئیسرائیل لە بەیاننامەیەکدا گوتی: «وانە ئۆپەراسیۆنییەکانی هەڵمەتەکەمان بەرانبەر ئێران، ناچارمان دەکات پەرەپێدانی تواناکانی سەربازی خێرا بکەین. کڕینی ئەم سکوادرانانە بەشێکی جیانەکراوەی بەرنامەی “ماگن ئیسرائیل”ە بۆ پاراستنی باڵادەستیی جۆریی بەردەوامی سوپای ئیسرائیل. ئەرکمان ڕوونە؛ دەبێت لە دوژمنەکانمان پێش بکەوین.»
وەزارەتی بەرگریی ئیسرائیل ئەم هەنگاوەی بە «یەکەمین هەنگاو» لە جێبەجێکردنی پلانی بەهێزکردنی سەربازی لە ماوەی دە ساڵی داهاتوودا ناو برد؛ پلانێک بە بودجەی نزیکەی ٣٥٠ ملیار شیکڵ (١٠١ ملیار یۆرۆ).