بڕیارە ئهمڕۆ دووشەممە بە ئامانجی دابینکردنی هاوکاریی زیاتری بەرگریی ئاسمانی بۆ ئۆکرانیا هاوپەیمانانی ڕۆژئاوا لە پاریس کۆببنەوە. ئەم هەنگاوە لە کاتێکدایە کە کیێڤ بەدەست کەمیی تەقەمەنییەوە دەناڵێنێت و هێرشە بالیستییەکانی ڕووسیا بۆ سەر ئەو وڵاتە چڕتر بوونەتەوە.
ڤۆلۆدیمێر زیلینسکی، سەرۆکی ئۆکرانیا، لەگەڵ لانیکەم ٢٥ سەرکردەی وڵاتانی جیهان لە کۆبوونەوەی “هاوپەیمانیی ویست” (Coalition of the Willing) بەشدار دەبێت. کۆبوونەوەکە تەنها بۆ هاوکاری سەربازی نییە، بەڵکو ئامانج لێی داڕشتنی هەڵوێستێکی یەکگرتووە بۆ هەر دانوستانێکی ئاشتی و دابینکردنی گەرەنتی ئەمنیی درێژخایەن بۆ ئۆکرانیا.
هەوڵەکان بۆ بەرپەرچدانەوەی موشەکە بالیستییەکان
جان نۆێل بارۆ، وەزیری دەرەوەی فەرەنسا، لە لێدوانێکدا ڕایگەیاند: “موشەکە بالیستییەکانی ڤلادیمێر پوتین بە ئەنقەست ناوچە مەدەنییەکان دەکەنە ئامانج و مانگی ڕابردوو یەکێک بووە لە خوێناویترین مانگەکان لە سەرەتای جەنگەکەوە.”
بەرپرسێکی کۆشکی ئەلیزێ ئاماژەی بەوە کرد کە تەوەری سەرەکیی کۆبوونەوەکە بریتی دەبێت لە:
١. دابینکردنی ژمارەیەکی زیاتر لە سیستەمی “پاتریۆت”ی ئەمریکی.
٢. خێراکردنی بڵاوکردنەوەی سیستەمی بەرگریی “SAMP-T”ی فەرەنسی-ئیتاڵی.
٣. تاوتوێکردنی پەرەپێدانی پیشەسازیی بەرگریی هاوبەش لە نێوان ئەوروپا و ئۆکرانیا بۆ بەرهەمهێنانی سیستەمی جێگرەوە.
هێزی فرەنەتەوەیی و مەشقی سەربازی
ئیمانوێل ماکرۆن، سەرۆکی فەرەنسا، بەنیازە لەم کۆبوونەوەیەدا چەند بڕیارێکی گرنگ ڕابگەیەنێت، لەوانە ئەنجامدانی مەشقی سەربازیی هاوبەش لە دەرەوەی خاکی ئۆکرانیا. ئەم مەشقانە وەک هەنگاوێکی پراکتیکی دەبینرێن بۆ پێکهێنانی “هێزی فرەنەتەوەیی لە ئۆکرانیا” (MNFU) کە بوارەکانی زەمینی، ئاسمانی، دەریایی و مەشق و ڕاهێنان دەگرێتەوە.
سزای نوێ و بەرەنگاربوونەوەی “کەشتیگەلی سێبەر“
جگە لە لایەنی سەربازی، وڵاتانی ڕۆژئاوا هەوڵ دەدەن سەرچاوە داراییەکانی مۆسکۆ وشک بکەن. بڕیارە هەفتەی داهاتوو یەکێتیی ئەوروپا ٢١ـەمین پاکێجی سزاکانی سەر ڕووسیا پەسەند بکات. یەکێک لە ئامانجە سەرەکییەکان، ڕێگریکردنە لەو کەشتییە نەوتهەڵگرانەی بە “کەشتیگەلی سێبەر” ناسراون و ڕووسیا بۆ دەربازبوون لە سزاکان و فرۆشتنی نەوتەکەی بەکاریان دەهێنێت.
ئەم کۆبوونەوەیەی پاریس تەنها چەند ڕۆژێک دوای لووتکەی ناتۆ دێت، کە تێیدا جەخت لەسەر یەکڕیزیی وڵاتانی ڕۆژئاوا و بەردەوامیی پشتیوانییەکان بۆ کیێڤ کرابووەوە، لە کاتێکدا ئۆکرانیا هێرشە درۆنییەکانی بۆ سەر دامەزراوە نەوتییەکان و کارگەکانی چەک لە ناو قوڵایی خاکی ڕووسیادا زیاد کردووە.
رۆیتهرز