لە نوێترین ڕووداودا، فەرماندەیی بەرگریی ئاسمانیی ئەمریکای باکوور (NORAD) ڕۆژی یەکشەممە ٩ی ئابی ٢٠٢٦ دوو فڕۆکەی مەدەنیی گشتیی ڕاگرت. ئەو فڕۆکانە چووبوونە نێو ناوچەیەکی کاتیی قەدەغەکراوی فڕین لە دەوروبەری یانەی گۆڵفی «ترەمپ ناشناڵ» لە شاری بێدمینستەری ویلایەتی نیوجێرسی. بەپێی ڕاگەیاندراوی NORAD و ڕاپۆرتی New York Post، فڕۆکە جەنگییەکانی F-16 ئەو دوو فڕۆکەیەیان بە سەلامەتی لە ناوچەکە دەرکرد؛ دۆناڵد ترەمپ لە کاتی ڕووداوەکەدا لە نێو یانەکەدا بوو.
NORAD جۆری فڕۆکەکان یان ژمارەی فڕۆکە جەنگییە بەشداربووەکانی ئاشکرا نەکرد، بەڵام گوتی هەردوو فڕۆکەکە لە جۆری فڕۆکە مەدەنییە گشتییەکان بوون. هۆکاری چوونە نێو سنووری قەدەغەکراوەکە تا ئێستا دیار نییە و بڕیار دراوە لەلایەن دەزگای فیدراڵیی فڕۆکەوانیی ئەمریکا (FAA) لێکۆڵینەوەی لەسەر بکرێت.
هەر ئەو ڕۆژە، تۆڕی Fox News بەپێی سەرچاوەکانی ڕایگەیاند سیستەمی چاودێریی ئاسمانی فڕۆکەیەکی سێیەمی بینیوە؛ ئەمەش کەمێک پێش جێهێشتنی ناوچەکە لەلایەن ترەمپەوە بوو. بەپێی ئەو ڕاپۆرتە، پێوەندی لەگەڵ فڕۆکەوانەکە لە کاتێکی زوودا دروست کرا و پێویستی بە هەنگاوی سەربازیی زیاتر نەبوو. NORAD بە فەرمی باسی لە ڕاگرتنی فڕۆکەی سێیەم نەکرد.
کۆشکی سپی تا ئێستا وردەکاریی زیاتری دەربارەی ڕووداوەکە بڵاو نەکردەوە. نووسینگەی تایبەتی سەرۆک لەباری هەستیاریی ئاسایشەوە هیچ هەواڵێکی نەدا و هیچ نیشانەیەکیش بڵاو نەکرایەوە ئەو چوونە نێو سنوورییە پێوەندیی بە هەڕەشەیەکی ئاسایشییەوە هەبێت.
هاوکات لەگەڵ کاتی گەشت و مانەوەی سەرۆکی ئەمریکا لە شوێنێک، FAA سنووری فڕین بە شێوەی کاتی دادەنێت؛ ئەم سنوورانە بە «TFR» دەناسرێن. مەبەستی ئەم کارە پاراستنی ئاسمانی دەوروبەری شوێنی بوونی سەرۆکە، نەک داخستنی هەمیشەیی ئاسمان. پێویستە فڕۆکەوانان پێش هەر فڕینێک ئاگادارییە فەرمییەکانی FAA، یان NOTAM، بپشکنن.
NORAD دوای ئەم ڕووداوە جارێکی تر ئاگادارییەکەی دووبارە کردەوە و داوای لە فڕۆکەوانان کرد پێش فڕین، بە تایبەتی لە ناوچەی بێدمینستەر، هەموو ئاگادارییە نوێکراوەکانی ئاسمان بخوێننەوە. ئەم دەزگایە لە مانگی ئابی ٢٠٢٥یشدا چەندین جار وەڵامی چوونە نێو TFRی لە هەمان ناوچەدا دایەوە.
ڕووداوە نوێیەکە لە کاتێکدا ڕووی دا کە هەستیاریی دەزگا ئاسایشییەکانی ئەمریکا دەربارەی پاراستنی ترەمپ بەرزە. ڕۆژی ٢ی ئابی ٢٠٢٦، پۆلیس پیاوێکی ٣٨ ساڵەی لە یانەی گۆڵفی ترەمپ لە ڕانچۆ پالۆس ڤێردێزی نزیک لۆس ئانجلەس دەستگیر کرد. بەپێی بەڵگەنامە دادوەرییەکان و ڕاپۆرتی Associated Press، لە ئۆتۆمبێلەکەیدا چەک، تەقەمەنی، دووربین و ناسنامەیەکی ساختە دۆزرایەوە؛ بەڵام بەرپرسان گوتیان لەو کاتەدا هیچ هەڕەشەیەکی باوەڕپێکراو بۆ سەر خەڵک پشتڕاست نەکرایەوە.
هەروەها ڕۆژی ٢٥ی نیسانی ٢٠٢٦ چەکدارێک هەوڵی دا لە هۆتێلی میوانداریی ئاهەنگی ساڵانەی ڕێکخراوی ڕۆژنامەنووسانی کۆشکی سپی لە واشنتن تێپەڕێت؛ ترەمپ لەو میواندارییەدا بوو. ئەو پیاوە دواتر بە تاوانی هەوڵدان بۆ کوشتنی سەرۆک تاوانبار کرا.
ترەمپ لە ١٣ی تەممووزی ٢٠٢٤ (لە کۆبوونەوەیەکی بانگەشەی هەڵبژاردندا لە پێنسلڤانیا بریندار بوو. هەروەها ڕایان ڕاس، ئەوەی لە ١٥ی ئەیلوولی ٢٠٢٤ لە فلۆریدا بە هەوڵی کوشتنی ترەمپ تاوانبار کرا، ڕۆژی ٤ی شوباتی ٢٠٢٦ (١٥ی ڕێبەندانی ١٤٠٤) بە زیندانی هەتاهەتایی و ٨٤ مانگی زیادە، حوکم درا.