ئەمشەو لەسەر یاریگای فرانسۆ هەریری لەهەولێری پایتەختی هەرێمی کوردستان کاتژمێر 21:00 یانەی هەولێر لەبەردەم هاندەرانی میوانداری یانەی کارەبا دەکات لەیەکەمین گەڕی خولی ئەستێرەکانی عێراق بۆ وەرزی 2026-2027.
ئەم وەرزە هەولێر گۆڕانکاری زۆری لەپێکهاتەی خۆی کردوە،چەند یاریزان یانەکەیان جێهێشت و چەند یاریزانێکیش ڕوویانکردە یانەکە،لەگەڵ ئەوەشدا دوای ڕۆیشتنی باسم قاسمی ڕاهێنەر یانەی هەولێر لوئەی سەڵاحی هێنایە شوێنی و بۆ ئەم وەرزە سەرپەرشتی تیپەکەی پایتەخت دەکات.
هەولێر وەرزی ڕابردوو ئاستێکی خەیاڵی پێشکەش کرد،سەرەڕای ئەو بەربەست و قەیرانانەی لەیانەکە هەبوون،بەڵام توانی پلەی سێیەمی خولی ئەستێرەکانی عێراق بەدەست بهێنێت و کورسییەکی جامی یانەکانی کەنداو دەستەبەر بکات،کە بۆ ئەم وەرزە دوای دابڕانێکی زۆر دەچێتەوە نێو ڕکابەرییەکانی دەرەوەی عێراق.
“سەرکار ڕێبوار”