داود هۆهان، نوونەرێ پێکهاتەیا ئەرمەنان ل دەڤەرا زاخۆ، ب هەلکەفتا بەخشینا مەدالییا بلند یا قەداسەتا پاپایێ ڤاتیکان ب ڕێزدار سەرۆک مەسعود بارزانی، پەیامەکا پیرۆزباهییێ ئاراستەی جەنابێ وی و گەلێ کوردستانێ کر.
د پەیاما خوەدا، نوونەرێ پێکهاتەیا ئەرمەنان بۆ ئاژانسی هەوالی زاگرۆس گووت: “هەمی پێکهاتەیێن کوردستانێ ب شانازییێ ڤە دیدەڤانێن ڕۆلێ مێژوویی و کاریگەرێ ڕێزدار سەرۆک بارزانینە د پشتەڤانیکرنا مافێن پێکهاتە و ئاییناندا، نەخاسمە د پاراستنا سەقامگیری و پێکڤەژیانێدا ل کوردستان و عیراقێ.”
داود هۆهان ئاماژە ب هندێ ژی کر: کو ل بن سیبەرا سەرکردایەتییا حەکیمانەیا سەرۆک بارزانی، هەرێما کوردستانێ بوویە نموونەیەکا گەشا هەڤپشکی و پێکڤەژیانا ئاشتییانە. وی گۆت ژی: “پشتی سالا ٢٠٠٣ و هەروەسا پشتی هێرشێن تیرۆرستێن داعش ل سالا ٢٠١٤، هەرێما کوردستانێ بوو پەناگەهەکا ئارام بۆ کریستیانان و هەمی لایەکی، ئەڤە ژی بەرهەمێ وێ فەلسەفەیا پێکڤەژیانێیە یا کو سەرۆک بارزانی بنیات نایە.”
ل کۆتایییا پەیاما خوەدا، نوونەرێ ئەرمەنان بۆ ئاژانسی هەوالی زاگرۆس: تەکەز ل سەر هندێ کر کو جڤاکا ناڤدەولەتی ب چاڤەکێ مەزن تەماشای ڕۆلێ سەرۆک بارزانی دکەت وەک سمبۆلێ ئاشتی و تەباییێ. هەروەسا دووپات کر کو ب بەردەوامیدان ب ڕێبازا پیرۆزا بارزانی، حکومەتا هەرێما کوردستانێ دێ هەر ب پشتەڤان و پارێزەرا سەرەکی یا هەمی پێکهاتەیێن نەتەوەیی و ئایینی مینت.