قەیرانی بەنزین لە ئێران گەیشتووەتە قۆناغێکی هەستیار، لەگەڵ بەرزبوونەوەی بەکارهێنان بۆ نزیکەی ١٣٥ ملیۆن لیتر لە ڕۆژێکدا. لە هەمان کاتدا، حکومەت خۆی بۆ هەڵبژاردنی یەکێک لە سێ سناریۆ ئامادە دەکات کە لە سنووردارکردنی دابینکردن، فرۆشتنی بەکارهێنانی زیادە بە نرخی بێ یارمەتی، یان گواستنەوەی سەهمی بەنزین لە ئۆتۆمبێل بۆ هاووڵاتیان دەگۆڕێت.
ئیسمائیل سەقاب ئەسفەهانی، سەرۆکی ڕێکخراوی بەڕێوەبردن و ڕێکخستنی وزە، ڕایگەیاندووە کە حکومەت سێ بەرنامەی جددی لەبەرچاوە و پێش جێبەجێکردنی هەر بڕیارێک، وردەکارییەکانی بۆ هاووڵاتیان ڕوون دەکاتەوە. بە وتەی ئەو، بڕیارەکە چەند هەفتە پێش جێبەجێکردن ڕادەگەیەنرێت.
لەگەڵ ئەوەشدا، ڕێکخراوەکە دەڵێت تا ئێستا هیچ بڕیارێکی نووسراو یان کۆتایی دەربارەی گۆڕینی نرخەکان یان میکانیزمی دابەشکردنی بەنزین دەرنەچووە.
بەپێی داتاکان، بەکارهێنانی بەنزین لە ئێران گەیشتووەتە نزیکەی ١٣٥ ملیۆن لیتر لە ڕۆژێکدا، لە بەرامبەر بەرهەمهێنانی نزیکەی ١١٢ ملیۆن لیتر لە پاڵاوگەکان.
هەروەها نزیکەی ٩ ملیۆن لیتری تر لە ڕێگەی گۆڕینی بەرهەمە پتروشیمیاییەکانەوە بۆ بەنزین دابین دەکرێت. بە پێی گۆڕانی بەرهەمی ڕۆژانە و ڕێژەی بەکارهێنانی کۆگا، کەمبوودی بەنزین لە ئێران لە نێوان ١٤ تا ١٥ ملیۆن لیتر لە ڕۆژێکدادەخەمڵێنرێت، کە بە هاوردەکردن یان بەکارهێنانی کۆگاکان پڕ دەکرێتەوە.
ڕێکخراوی ڕێکخستنی وزە پێشبینی دەکات ئێران پێویستی بە هاوردەکردنی لانیکەم ١٥ ملیۆن لیتر بەنزین لە ڕۆژێکدا هەبێت، بە تایبەتی لەگەڵ ئەو کێشانەی کە لە دابینکردنی پارە، دەستگەیشتن بە دراوی بیانی و ڕێگاکانی گەیاندنی بەنزین لە دەرەوە هەیە.
یاسەر میرزایی، جێگری سەرۆکی ڕێکخراوی ڕێکخستنی وزە، هۆشداری داوە کە بەردەوامبوونی بەکارهێنانی کۆگاکانی بەنزین، دۆخی ئێران لاواز و هەستیار دەکات و ئاستی کۆگاكان بە خێرایی بەرەو قۆناغێکی نیگەرانیهێنەر نزیک دەبێتەوە.
ئەو هەروەها وتوویەتی ئەگەر بارودۆخی ئابووری ئاسایی بووایە، بەکارهێنانی بەنزین لە ئێران دەتوانی بگاتە ١٤٠ تا ١٤٥ ملیۆن لیتر لە ڕۆژێکدا؛ ئەمەش فشارێکی زیاتر لەسەر دابینکردنی بەنزین دروست دەکات.