سەرۆکی هاوپەیمانیی دەوڵەتی یاسا، نوری مالیکی، جەختی لەسەر پێویستیی چارەسەرکردنی دۆسیەی کۆنتڕۆڵی چەک لە دەستی دەوڵەتدا کردەوە بە شێوازێک کە دوور بێت لە ئاڵۆزی، گرژکردنەوە یان ڕووبەڕووبوونەوەی چەکداری.
دۆخی هەستیاری وڵات و پشتیوانی لە حکومەت:
نوری مالیکی لە میانی کۆبوونەوەی لەگەڵ ژمارەیەک شیکەرەوە و پسپۆڕی بواری سیاسی ڕایگەیاند کە عێراق لە قۆناغێکی هەستیاردا دەژێت کە پێویستی بە ئاستێکی بەرزی دانایی و بەرپرسیارێتی هەیە.
ئاماژەی بەوە کرد کە هەوڵێک هەیە بۆ دروستکردنی ئاڵۆزی لە ژینگەی سیاسی و تێکدانی سەقامگیری، لە کاتێکدا چوارچێوەی هەماهەنگی بەردەوامە لە پشتیوانیکردنی حکومەت بۆ پاراستنی سەقامگیری و بەرژەوەندییە باڵاکانی وڵات.
مەترسییەکانی ڕووبەڕووبوونەوە لەسەر دۆسیەی چەک:
مالیکی هۆشداریدا کە گۆڕینی دۆسیەی چەکداری بۆ شەڕ و پێکدادان لە نێوان دەوڵەت و گرووپە چەکدارەکاندا مەترسییەکی زۆر گەورە دروست دەکات و سەقامگیریی عێراق دەخاتە مەترسییەوە.
جەختی کردەوە کە «هەر ڕووبەڕووبوونەوەیەکی ناوخۆیی زەرەر و زیانە بۆ تەواوی عێراق، نه ک تەنها بۆ لایەن یان پێکهاتەیەکی دیاریکراو»، و ئەوانەی پێیان وایە کە ناکۆکی یان ململانێی ئەگەری تەنها “شیعە – شیعە” دەبێت لە هەڵەدان، چونکە لێکەوتەکانی تەواوی دەوڵەت، کۆمەڵگە و سەرجەم پێکهاتەکان دەگرێتەوە.
ڕێگریکردن لە شەڕی ناوخۆ و پاراستنی سەروەری:
مالیکی دووپاتی کردەوە کە حکومەت و چوارچێوەی هەماهەنگی ڕێگە نادەن وڵات بەرەو شەڕی ناوخۆیی بڕوات؛ بۆیە پێویستە تێڕوانینێکی نیشتمانی و هەرێمیی ڕوون گەڵاڵە بکرێت بۆ ڕێگریکردن لە مەترسییەکان و ڕێگریکردن لەوەی عێراق بێتە گۆڕەپانی یەکلاییکردنەوەی ململانێ و بەرژەوەندییە هەرێمی و نێودەوڵەتییەکان.
پەلەکردن لە پڕکردنەوەی وەزارەتە چۆڵەکان:
لە کۆتاییدا، سەرۆکی هاوپەیمانیی دەوڵەتی یاسا جەختی لەسەر گرنگیی پەلەکردن لە تەواوکردنی کابینەی وەزاری و کۆتاییهێنان بە دۆسیەی وەزارەتە بەتاڵەکان کردەوە، ئاماژەی بەوەش کرد کە سەرۆکی ئەنجومەنی وەزیران، عەلی ئەلزێدی، هەمان ئارەزووی هەیە بۆ یەکلاییکردنەوەی ئەم دۆسیەیە.