سێرگی لاڤرۆڤ، وەزیری دەرەوەی ڕووسیا ڕایگەیاند مۆسکۆ زیادبوونی چالاکییەکانی ناتۆ لە جەمسەری باکوور بە هەڕەشەیەکی ڕاستەوخۆ بۆ سەر ئاسایشی خۆی دەزانێت. ناتۆ لە گەرمەی گرژییەکان لەگەڵ مۆسکۆ و هەوڵەکانی ترەمپ بۆ دەستبەسەرداگرتنی گرینلەند، ئەرکێکی سەربازیی بۆ بەهێزکردنی ئامادەیی خۆی لەم ناوچەیەدا دەست پێکردووە.
لاڤرۆڤ لە وتارێکدا ئاماژەی بەوە کرد هاوپەیمانیی ناتۆ دوای شەڕی ڕووسیا لە دژی ئۆکراینا، ئامادەیی خۆی لە جەمسەری باکووردا زیاتر کردووە. ناتۆ لە مانگی شوباتدا ئۆپەراسیۆنێکی بە ناوی «پاسەوانی جەمسەری باکوور» (Arctic Sentry) ڕاگەیاند.
ڕووسیا لە جەمسەری باکووردا کەشتیگەلێکی دەریایی لە ژێردەریایییە ئەتۆمییەکان هەیە و ئەم ناوچەیە بە پانتایی بەرژەوەندییەکانی خۆی دادەنێت.
لاڤرۆڤ لە وتارەکەیدا مانۆڕە سەربازییەکانی ناتۆی لەم ناوچەیەدا بە «پەلاماردەرانە» وەسف کرد و گوتی: «ئەم جۆرە چالاکییە سەربازییانە لە ناوچە دوورەدەستەکانی باکووردا، هەڕەشەی ڕاستەوخۆ بۆ سەر ئاسایشی ڕووسیا دروست دەکەن. مەترسیی ڕوودانی ئەو ڕووداوانەی دەکرێت ببنە هۆی ڕووبەڕووبوونەوەی چەکداری بە ئەنجامی کارەساتبارەوە، لە زیادبووندایە.»
ڕووسیا گەورەترین ژێرخانی سەربازیی لە جەمسەری باکووردا هەیە و چینیش چالاکییەکانی لەم ناوچەیەدا بە هاوبەشی لەگەڵ مۆسکۆ زیاد کردووە. نەرویژیش وەک دراوسێی ڕووسیا لە مانگی ئابدا لیوایەکی سەربازیی تازەدامەزراوی لەم ناوچەیەدا فراوانتر کرد. مۆسکۆ هەموو ئەو دەنگۆیانە ڕەت دەکاتەوە باس لەوە دەکەن ڕووسیا هەڕەشەیە بۆ سەر ناتۆ.