بەگوێرەی ئامارە فەرمییەکان، لە ماوەی 12 مانگی ڕابردوودا نزیکەی 20 هەزار کۆچبەر گەیشتوونەتە ئیسرائیل، کە ئەمەش نزمترین ئاستی ساڵانە نیشان دەدات لە دوای پەتای کۆرۆناوە و کەمترین ڕێژەیە لە ماوەی زیاتر لە دەیەیەکدا.
گوتەبێژی وەزارەتی کۆچبەری ئیسرائیل ڕایگەیاند، ئەو داتایانە ماوەی نێوان 23ـی ئەیلولی 2025 بۆ 3ـی ئەیلولی 2026 لەخۆدەگرن و هێشتا ژمارەی کۆتایی ئەگەری گۆڕانکاریی تێدا هەیە. ئامارەکە بە بەراورد بە 21 هەزار و 244 کۆچبەری ساڵی پێشوو، نزیکەی 6% کەمی کردووە.
سەرەڕای ئەوەی لە زۆربەی وڵاتانی ڕۆژئاوا ڕێژەی کۆچکردن ڕووی لە هەڵکشان کردووە، بەڵام دابەزینی توند لە ژمارەی کۆچبەرانی ڕووسیا هۆکاری سەرەکیی ئەم کەمبوونەوەیە بووە لە ئیسرائیل.
لە ماوەی ساڵی ڕابردوودا 5 هەزار و 685 کۆچبەر لە ڕووسیاوە گەیشتوونەتە ئیسرائیل؛ ئەمەش لە کاتێکدایە کە لە ساڵی پێشووتردا 9 هەزار و 282 کۆچبەر و لە ماوەی 2023 بۆ 2024دا 19 هەزار و 407 کۆچبەر ڕوویان لەو وڵاتە کردبوو. سەرەڕای ئەم دابەزینە بەرچاوە، ڕووسیا هێشتا بە گەورەترین سەرچاوەی کۆچبەران بۆ ئیسرائیل دەمێنێتەوە و دوای ئەویش فەرەنسا بە 4 هەزار و 364 کۆچبەر و ئەمریکا بە 3 هەزار و 333 کۆچبەر لە پلەی دووەم و سێیەمدان.
لەلایەکی ترەوە، ڕۆژنامەی «تایمز ئۆف ئیسرائیل» بڵاوی کردووەتەوە کە هاووڵاتییانی ئیسرائیل بە ژمارەیەکی پێوانەیی بەردەوامن لە چۆڵکردنی وڵاتەکە، و ڕەوتی بەجێهێشتنی ئیسرائیل لەلایەن هاووڵاتییان خۆیانەوە لە ئاستێکی بەرچاویدا دەمێنێتەوە کە ئەمەش بەهۆی ململانێ سەربازییەکان و ناسەقامگیریی سیاسیی ناوخۆییەوە دروست بووە.