سوپای کۆریای باشوور ڕایگەیاند، ڕۆژی یەکشەممە کۆریای باکوور لە ماوەی کەمتر لە سێ کاتژمێردا دوو مووشەکی بالیستیی کورتمەودای بەرەو کەناراوەکانی ڕۆژهەڵاتی وڵاتەکەی هاویشتووە، ئەمەش دووەم زنجیرە تاقیکردنەوەی مووشەکییە لە ماوەی نزیکەی یەک هەفتەدا.
بەپێی ڕاگەیەندراوێکی دەستەی ئەرکانی هاوبەشی سوپای کۆریای باشوور، مووشەکی یەکەم لە نزیک ناوچەی “وۆنسان” لە کاتژمێر ٣:٠٠ی پاشنیوەڕۆ (کاتژمێر ٩:٠٠ی سەرلەبەیانی به كاتی ههرێمی كوردستان) هەڵدراوە و مەودای نزیکەی ٤٥٠ کیلۆمەتری بڕیوە، کە پێدەچێت لە زنجیرەی مووشەکی “هواسونگ-١١” بێت. تەنیا سێ کاتژمێر دواتر و لە کاتژمێر ٥:٥٠ی ئێوارە (کاتژمێر ١١:٥٠ی پێشنیوەڕۆ بهكاتی ههرێمی كوردستان)، مووشەکی دووەم لە هەمان ناوچەوە تەقێندراوە و زیاتر لە ٦٠٠ کیلۆمەتری بڕیوە بەر لەوەی بکەوێتە ناو ئاوەکانی دەریای ڕۆژهەڵات.
وەزارەتی بەرگریی ژاپۆن و کەناڵی فەرمیی ئەو وڵاتە (NHK) پشتڕاستیان کردەوە کە مووشەکەکان لە دەرەوەی ناوچەی ئابووریی تایبەتی ژاپۆن کەوتوونەتە خوارەوە. لای خۆیەوە شینجیرۆ کۆیزومی، وەزیری بەرگریی ژاپۆن ڕایگەیاند: “ئەم زنجیرە کردەوانەی کۆریای باکوور هەڕەشەن بۆ سەر ئاشتی و ئاسایشی ژاپۆن، ناوچەکە و تەواوی کۆمەڵگەی نێودەوڵەتی.” هاوکات تۆکیۆ لە ڕێگەی کەناڵە دیپلۆماسییەکانیەوە لە پەکین ناڕەزایەتیی فەرمیی خۆی گەیاندە پیۆنگ یانگ.
لە کاردانەوەی ئەم هەنگاوەدا، ئەنجومەنی ئاسایشی نیشتمانیی کۆریای باشوور بە توندی تاقیکردنەوەکانی ئیدانە کرد و داوای لە پیۆنگ یانگ کرد دەستبەجێ چالاکییە مووشەکییەکانی بوەستێنێت، چونکە ئەم تاقیکردنەوانە پێشێلکردنی ئاشکرای بڕیارەکانی ئەنجومەنی ئاسایشی نەتەوە یەکگرتووەکانن.
ئەم تاقیکردنەوانە دوای ئەوە دێن کە کۆریای باکوور بڕیارێکی ئاژانسی نێودەوڵەتیی وزەی ئەتۆمی دژی بەرنامە ئەتۆمییەکەی ڕەتکردەوە. هەروەها هەفتەی ڕابردوو کیم یۆ جۆنگ، خوشکی بەهەژموونی کیم جۆنگ ئونی ڕێبەری کۆریای باکوور، مەشق و ڕاهێنانە سەربازییە هاوبەشەکانی نێوان ئەمریکا، کۆریای باشوور و ژاپۆنی بە هۆکاری سەرەکیی “قووڵبوونەوەی گرژییەکان” لە نیمچەدوورگەی کۆریا ناوبرد و جەختی کردەوە کە وڵاتەکەی لەسەر بەهێزکردنی توانای چەکی ئەتۆمیی خۆی بەردەوام دەبێت.
-
مووشەکی یەکەم: (کە لەوێ ٣:٠٠ی پاشنیوەڕۆ بووە).
-
مووشەکی دووەم: کاتژمێر ١١:٥٠ی پێشنیوەڕۆ (کە لەوێ ٥:٥٠ی ئێوارە بووە).