زۆربەی دەرمانەکانی چارەسەری کیمیایی ئەو خانانە دەکەنە ئامانج بە خێرایی دابەش دەبن، بەڵام خانە شێرپەنجەییە خەوتووەکان بە ڕاگرتنی دابەشبوونی خۆیان دەتوانن لە نێو گرێدا بمێننەوە، لە چارەسەر ڕزگاریان بێت و دواتر نەخۆشییەکە سەری لێ هەڵبداتەوە.
توێژەرانی ئەنجومەنی توێژینەوەی پزیشکیی بەریتانیا، کۆلێژی ئیمپریال و زانکۆی کۆلێجی لەندەن نەخشەیەکی وردی خانەکانی گرێی شێرپەنجەی مەمکیان کێشا و کۆمەڵێک خانەی متبوویان دۆزییەوە لە دۆخی خەوی زستانەدا دەمێننەوە.
دکتۆر ئەلێکسیس بار، یەکێک لە سەرپەرشتیارانی توێژینەوەکە گوتی: «خانە شێرپەنجەییە متبووەکان زۆر مەترسیدارن؛ لە چارەسەری کیمیایی خۆیان دەشارنەوە و دواتر دەتوانن چالاک ببنەوە و دابەشبوونی خانەکان دەست پێ بکەنەوە.»
بە گوێرەی توێژینەوەکە، بەهۆی گەشەی خێرای گرێ و کەمیی گەیشتنی خوێن و خۆراک، هەندێک لە خانەکان لە وەڵامی ئەم تەنگژەیەدا چالاکیی خۆیان تا ڕەخسانی دەرفەتی گونجاو ڕادەگرن. هەروەها دەرکەوت خانە خەوتووەکان لە نێو خانە بەرگرییەکان (ماکرۆفاجەکان) و خانەکانی بەستەرەشانەدا دەورە دراون و وەک قەڵغانێکی پارێزەر لە بەرانبەر دەرمانەکاندا دەیانپارێزن.
ئەنجامی ئەم لێکۆڵینەوەیە دەریدەخات چارەسەرەکانی داهاتوو دەبێت هاوکات لەگەڵ خانە خێراکان، خانە خەوتووەکان و ژینگەی دەوروبەریشیان بکەنە ئامانج، تا پێش بە گەڕانەوەی نەخۆشییەکە بگیرێت.
