بۆ کۆنترۆڵکردنی ئاستی شەکرەی خوێن، تەنیا تام و شیرینیی میوەکان پێوانە نین، بەڵکو بڕی کاربۆهیدرات لە هەر ژەمێکدا، قەبارەی ژەمەکە و شێوازی خواردنیشی کاریگەریی راستەوخۆیان هەیە. لە بەراوردکردنی نێوان فڕاولە و گێلاسدا، فڕاولە لە رووی ژمارەییەوە بژاردەیەکی گونجاوترە، بەڵام ئەمە بەو مانایە نییە گێلاس لە سیستەمی خۆراکیدا فەرامۆش بکرێت.
بەپێی داتاکانی وەزارەتی کشتوکاڵی ئەمریکا، پەرداخێک فڕاولە نزیکەی 53 کالۆری و 13 گرام کاربۆهیدراتی تێدایە، کە 8 گرامی شەکرە و زیاتر لە 3 گرامیشی ریشاڵە. لە بەرامبەردا پەرداخێک گێلاسی شیرینی تازەی ناوک دەرکراو، نزیکەی 97 کالۆری و 25 گرام کاربۆهیدراتی تێدایە، کە 20 گرامی شەکرە و بڕێکی نزیک لە فڕاولە ریشاڵی هەیە. ئەو ژمارانە لەگەڵ داتاکانی راپۆرتێکی تازەی ماڵپەڕی «فێری وێڵ هێڵس» یەکیانگرت.
سەبارەت بە هۆکاری پێشەنگبوونی فڕاولە، ئەم میوەیە رێگە دەدات قەبارەیەکی گەورەتری لێ بخورێت لە بەرامبەر بڕێکی کەمتری کاربۆهیدرات و کالۆریدا. ئەم تایبەتمەندییە ئەولەویەتێکی کردەیی بە فڕاولە دەبەخشێت بۆ ئەو کەسانەی پێویستیان بە ژماردنی وردی کاربۆهیدرات هەیە یان دەیانەوێت رێگری لە بەرزبوونەوەی خێرای شەکرەی خوێن بکەن.
بە باشتر ناوزەدکردنی فڕاولە، بەو مانایە نییە راستەوخۆ شەکرە دادەبەزێنێت یان رێگری لە بەرزبوونەوەی دەکات، بەڵکو تەنیا ئەوەیە ژەمێکی ئاسایی فڕاولە کاربۆهیدراتی کەمترە لە هەمان قەبارەی گێلاس. لەگەڵ ئەوەشدا گێلاس بژاردەیەکی خراپ نییە، چونکە میوەیەکی دەوڵەمەندە بە پێکهاتەی رووەکی و دەکرێت لە سیستەمێکی خۆراکیی هاوسەنگدا بەکاربهێنرێت ئەگەر ئاگاداری بڕەکەی بیت. بۆ ئەو کەسانەی چاودێری رێژەی کاربۆهیدرات دەکەن، خواردنی نیو پەرداخ تا سێ چارەکی پەرداخێک گێلاس گونجاوترە.
بڕی ژەمەکە کاریگەریی یەکلاکەرەوەی هەیە لەسەر ئەنجامەکە. کاردانەوەی شەکرەی خوێن بەپێی بڕی خواردن، باری تەندروستی، دەرمان، چالاکیی جەستەیی و پێکهاتەی ژەمەکە دەگۆڕێت.
خواردنی فڕاولە یان گێلاس لەگەڵ سەرچاوەیەکی پرۆتین یان چەوریی ناتێر، وەک ماستی بێ شەکر یان مشتێک چەرەزات، یارمەتی خاوکردنەوەی هەرس دەدات و کاردانەوەی شەکرەی خوێن هاوسەنگتر دەکات بەراورد بە خواردنی میوە بە تەنیا.
هەڵبژاردنی میوەی تازە یان بەستوو بەبێ شەکر، هەمیشە لە بەرهەمە شیرینکراوەکان باشترە. میوەی وشککراوە بڕێکی چڕتر لە کاربۆهیدراتی لە قەبارەیەکی بچووکدا هەیە، ئەمەش تێپەڕاندنی بڕی گونجاو ئاسانتر دەکات.
لە کۆتاییدا، فڕاولە بەهۆی کەمبوونی کاربۆهیدرات و شەکرەوە لە هەمان قەبارەدا بژاردەیەکی پەسەندترە، لەکاتێکدا گێلاس بژاردەیەکی قبووڵکراوە بە مەرجی کۆنترۆڵکردنی بڕەکەی. سەبارەت بە تووشبووانی شەکرە، هیچ بڕێکی دیاریکراو نییە بۆ هەمووان گونجاو بێت و پێویستە بژاردەکان بەپێی پلانی خۆراکی و پێوانەی تاکەکەسیی شەکرە دیاری بکرێن.