ئەمڕۆ سێشەممە، 27ـی تشرینی یەکەمی 2026، شانەی راگەیاندنی ئەمنیی عێراق سروشتی ئەو دەنگە تەقینەوانەی ئاشکراکرد کە لە بەغدا بیستراون.
سەعد مەعن، سەرۆکی شانەکە لە تۆمارێکی دەنگیدا کە سۆمەریە نیوز بڵاویکردەوە، رایگەیاند، ئەو تەقینەوانەی کەمێک پێش ئێستا لە چەند ناوچەیەکی پایتەخت بیستراون، بەهۆی خستنەخوارەوەی فڕۆکەیەکی بێفڕۆکەوانەوە بووە لە دەوروبەری ناوچەی سەوز لە ناوەڕاستی بەغدا.
مەعن روونیکردەوە، فڕۆکەکە نەناسراو بووە و رێکاری پێویست بەرامبەری گیراوەتە بەر. هاوکات لێکۆڵینەوەکان لەو بارەیەوە بەردەوامن.
لەلایەکی دیکەوە، سەرچاوەیەکی ئەمنی جەختیکردەوە، ئاگادارکەرەوەی ناو باڵیۆزخانەی ئەمریکا لە بەغدا بەردەوامە لە لێدان.