ئەمڕۆ چوارشەممە 17ـی تەمووزی 2024، ئومێد خۆشناو پارێزگاری هەولێر، لە كۆنگرەیەكی رۆژنامەوانیدا رایگەیاند، لە ئایندەیەكی نزیكدا مەسرور بارزانی سەرۆكی حكومەتی هەرێمی كوردستان، پڕۆژەیەكی ستراتیجی بۆ چارەسەركردنی كێشەی كەمئاوی وەك “موژدە و دیارییەك” بۆ خەڵكی هەولێر ڕادەگەیەنێت.
پارێزگری هەولێر زیاتر گوتی، ئەو پڕۆژەیەی سەرۆك وەزیرانی هەرێمی كوردستان ڕایدەگەیەنێت، ئێستا لە قۆناغی كۆتایی جێبەجێكردندایە و بە تەواوبوونی پڕۆژەكە، كێشەی كەمئاوی لە تەواوی سنووری پارێزگای هەولێر چارەسەر دەبێت.
باسی لەوەش كرد، چارەسەركردنی گرفتی ئاو لە شاری هەولێر لە پێشینەی كارنامەی كابینەی نۆ و خودی سەرۆك وەزیرانە، بۆیە لە زۆربەی گەڕەكەكان گرفتی گەیاندن و دابەشكردنی ئاوی پاك چارەسەر كراوە، ئەو شوێنانەش ماون، لە ئایندەیەكی نزیك گرفتەكانیان چارەسەر دەبن.