لە دانیمارك دوو تەقینەوە لە نزیك باڵوێزخانەی ئیسرائیل ڕوویان دا

دوو تەقینەوە لە پایتەختی دانیمارك و لە نزیك باڵوێزخانەی ئیسرائیل ڕوویان دا، هیچ زیانێكی گیانییش تۆمار نەكراوە.

بەپێی زانیاریی میدیا جیهانییەكان، ئەمڕۆ چوارشەممە 2/10/2024، لە شاری (كۆپنهاگن)ی پایتەختی دانیمارك، دوو تەقینەوە لە نزیك باڵوێزخانەی ئیسرائیل ڕوویان دا.

باس لەوە دەكرێ، تەقینەوەکان هیچ زیانێكی گیانییان بەدواوە نەبووە، پۆلیسی شارەكەش دەستی بە لێكۆڵینەوەكان كردووە.

ئەم تەقینەوانە دوای ئەوە دێت، شەوی ڕابردوو 1/10/2024، ئێران هێرشێكی مووشەكی كردە سەر ئیسرائیل، لە ئەنجامی هێرشەكەی ئێرانیش، لانیکەم هەشت کەس کوژران و حەوت کەسیش برینداری سەختن، سەرچاوەکان باس لەوە دەکەن، ئەم کەسانە لە شەقامی قودس لە شاری یافا بوونەتە قوربانی.

لە کاردانەوەی هێرشە مووشەکییەکانی ئێران بۆ سەر ئیسرائیل، سوپای ئیسرائیل هەڕەشە دەکات و دەڵێت: “ئەمشەو وەڵام دەدەینەوە.”

بەپێی هەندێک میدیای جیهانی، هێرشەکە فراوان دەبێت و هەموو پێگە و دەستوپێوەندەکانی ئێران لە ڕۆژهەڵاتی ناوەڕاست دەگرێتەوە.

هەر لەمبارەیەوە، کەناڵی (12ی عیبری) ڕایگەیاندووە: هێرشەکەی ئیسرائیل چڕ دەبێت.