بەرپرسێكی وەزارەتی دارایی و ئابووریی حكوومەتی هەرێمی كوردستان ئاشكرای دەكات، بڕیارە ئەمڕۆ وردبینیی لیستی مووچەی 10 تەواو بکرێت و چاوەڕوانن سبەی تەمویل بنێردرێ.
بەرپرسێكی وەزارەتی دارایی و ئابووریی حكوومەتی هەرێمی كوردستان، رایگەیاند: “شەوی ڕابردوو شاندێکی دارایی حکوومەتی هەرێمی کوردستان گەیشتووەتە بەغدا، چوونی شاندەکە لەسەر داوای بەغدا بووە و زیاتر پەیوەندی بە چەند بابەتێکی دارایی و پرسی (هەژماری من) و گرێبەستە گرنگ و دڵخۆشکەرەی بانکی بازرگانییەوە هەیە.”
لەبارەی وردبینیی لیستی مووچە، ئەو سەرچاوەی دارایی گوتی: “وردبینیی مووچە هەنگاوی باشی بڕیوە و چاوەڕوانین ئەمڕۆ وردبینی تەواو بێت و سبەی چوارشەممە تەمویلی مووچە بنێردرێت و ئەو بەڵێنەیان پێ داوین”
جەختی کردەوە، هەموو ئامادەکارییەکیان بۆ دابەشکردنی مووچەی مانگی 10 کردووه.
ڕۆژی 3/11/2024، وەزارەتی دارایی و ئابووریی حكوومەتی هەرێمی كوردستان، لە ڕاگەیاندراوێكی فەرمیدا ڕایگەیاند، لیستی مووچەی مانگی 10ـی فەرمانبەران و مووچەخۆرانی هەرێمی کوردستان، لەلایەن نوێنەری وەزارەتەکەیانەوە ڕادەستی بەڕێوەبەرایەتیی گشتیی ژمێریاری لە وەزارەتی دارایی حکوومەتی عێراق کراوە.
شوان بەرزنجی