ئێوارەی ئەمڕۆ سێشەممە 2025/1/7، لە چوارچێوەی تۆڕی میدیایی کوردستان، کەناڵی ئاسمانیی شەمس بە زمانی عەرەبی دەستی بە پەخش کرد، ئەم هەنگاوە هەنگاوێکی گرنگ و کاریگەرە و پێشکەوتنێکی بەرچاوە لە بواری میدیا لە هەرێمی کوردستاندا.
کردنەوەی کەناڵی شەمس هەنگاوێکی گرنگە بۆ پتر ناساندنی دۆزی ڕەوای گەلی کوردستان و گەیاندنی دیدگا ئاشتیخوازانەکەی بە دونیای عەرەبی و، برەودان بە ڕەوتی کاری میدیا بە زمانی عەرەبی، هیوادارین ڕۆڵی خۆی لەنێو میدیای عەرەبی بەشێوەیەکی بەرچاو بگێڕێت و ببێتە نموونەی میدیای سەرکەوتوو و سەکۆی گەیاندنی ڕاستییەکان بۆ بینەران .
لەم دەرفەتەدا وێڕای پیرۆزباییمان لە ستافی هێژای کەناڵی شەمس و بینەرانی ئازیزی، هیوای سەرکەوتنیان بۆ دەخوازین.
بەشی ڕۆشنبیری و ڕاگەیاندنی پارتی دیموکراتی کوردستان
٧ی کانونی دووەمی ٢٠٢٥