فڕۆکەیەکی بێ فڕۆکەوانی تورکیا بنکەیەکی سەربازیی هێزەکانی سوریای دیموکراتی (هەسەدە) لە گوندێکی حەلەب کردە ئامانج و لە ئەنجامدا چەکدارێکی هەسەدە کوژرا.
نێوەندی چاودێریی مافی مرۆڤی سووریا بڵاوی کردەوە، ئەمڕۆ فڕۆکەیەکی بێ‌فڕۆکەوانی تورکیا بنکەیەکی سەربازیی هێزەکانی سوریای دیموکراتی لە بەرەی “دێر حافر” لە خۆرهەڵاتی حەلەب کردە ئامانج و لە ئەنجامدا چەکدارێکی هەسەدە کوژرا و سێ چەکداری دیکەش بریندار بوون.
بەپێی هەواڵی ئەم نێوەندە، هەسەدە دوو شوێنی گرووپە چەکدارەکانی لە گوندەکانی حەلەب کردە ئامانج و لە ئەنجامدا ١٠ چەکدار کوژران، سەرکردەیەکیشیان لە نێواندا بوو.
بەپێی هەواڵی ئەم نێوەندە، لە ١٢ی کانوونی یەکەمی ساڵی ڕابردووەوە شەڕ لە نێوان گرووپەکانی سوپای نیشتمانی بە پشتیوانیی تورکیا و هەسەدە لە بەنداوی تشرین و گوندەکانی حەلەب بەردەوامە و لە ئەنجامی ئەم شەڕەدا ٥٠٥ چەکدار و کەسی سڤیل کوژراون.