ڕۆژی دووشەممە ١٠ ئادار، بەهۆی مانگرتنی کرێکارانەوە، ١١ فڕۆکەخانەی گەورەی ئەڵمانیا خزمەتگوزارییەکانیان ڕاگرت. ئەم مانگرتنە لە کاتژمێر ١١ی شەوی ڕابردووەوە دەستیپێکردووە و بڕیارە ٢٤ کاتژمێر بخایەنێت.
مانگرتنەکە وەک ناڕەزایی دەربڕینێک دژی کەمیی مووچەی کرێکاران دەکرێت کە داوا دەکەن پێداچوونەوە بە شایستە داراییەکانیاندا بکرێت، بەتایبەتی لەم دۆخە سەختەی ئابووریدا کە ئەڵمانیا و تەواوی ئەوروپای گرتووەتەوە.
بەپێی ئاماران، ئەم مانگکرتنە بووەتە هۆی هەڵوەشاندنەوەی نزیکەی ٣ هەزار و ٤٠٠ گەشت و دواکەوتنی گەشتی نزیکەی ٥٠٠ هەزار گەشتیار. هێشتا دیار نییە ئەم دۆخە تا چەند بەردەوام دەبێت و کاریگەریی زیاتر لەسەر گەشتەکان دەبێت یان نا.
