ئامارە فەرمییەکان دەری دەخەن کە ڕووداوەکانی هاتوچۆ لە ئێران ساڵانە دەبنە هۆی گیان لەدەستدانی هەزاران کەس و کەمئەندامبوونی دەیان هەزار کەسی دیکە. بەپێی ئامارەکان، لە ماوەی ساڵێکدا ١٦ هەزار و ٣٩٩ کەس گیانیان لەدەست داوە. ئەمە لە کاتێکدا ڕێکخراوی چاودێریی کۆمەڵایەتیی ڕایگەیاندووە ساڵانە ٦٠ هەزار کەس تووشی کەمئەندامی دەبن و بڕبڕەی پشتی ٣ هەزار کەسیش زیانی پێدەگات.
لە مانگی ئاداری ٢٠٢٤ـوە تا مانگی ئاداری ٢٠٢٥، بڕبڕەی پشتی ٤٣ هەزار کەس زیانی پێگەیشتووە و ئەم ژمارەیە ٣٧٪ی کۆی حاڵەتەکانی نەخۆشیی بڕبڕەی پشت لە ئێران پێکدەهێنێت.
هەروەها تەنیا لە دوو هەفتەی دوای نەورۆزی ساڵی ڕابردوو، ٧٠٠ کەس بەهۆی ڕووداوی هاتوچۆوە گیانیان لەدەست داوە و ١٨ هەزار کەسیش بریندار بوون.
عەلیڕەزا ڕەئیسی، بریکاری وەزارەتی تەندروستیی ئێران ئاشکرای کردووە تەمەنی ٨٣٪ی قوربانیان لە خوار ٥٠ ساڵەوەیە و زۆرینەیان گەنجانی تەمەن خوار ٣٠ ساڵن.
بەپێی گوتەی ناوبراو، زیاتر لە ٥٠٪ی هۆکارەکانی ڕووداوی هاتوچۆ بەهۆی هەڵەی شۆفێرییەوەیە و ٤٨٪یش بەهۆی کێشەکانی ڕێگەوبان و خراپیی جۆری ئەو ئۆتۆمبێلانەوەیە کە پیشەسازیی ئۆتۆمبێلی ئێران بەرهەمیان دەهێنێت.
