ئەكرەم ئیمامئۆغڵو، سەرۆكی گەورە شارەوانیی ئیستانبۆڵ و چەندان كەسی تر، لەلایەن ئاساییشی ئیستانبۆڵەوە دەستبەسەر كران، ئەمەش دوای ئەوە هات، كە بڕوانامەی ئیمامئۆغڵو لەلایەن دادگاوە هەڵوەشایەوە.
ئیمامئۆغڵو، سەرۆكی گەورەشارەوانیی ئیستانبۆڵ، خۆی ئامادە دەكرد تا لە ٢٣ی ئەم مانگەدا، لەلایەن پارتەكەی بیكەنە بەربژێر بۆ هەڵبژاردنی سەرۆكایەتیی توركیا، كە بڕیارە لە ٢٠٢٨ ئەنجام بدرێت، بەڵام دادگا بڕیاری دا بڕوانامەكەی هەڵوەشێتەوە، بەمەش رێگەیان لە ئیمامئۆغڵو گرت، كە بتوانێت ببێتە بەربژێر، چونكە بەگوێرەی دەستووری توركیا، ئەوەی بیەوێت ببێتە سەركۆماری توركیا، دەبێت بڕوانامەی لە بەكالۆریۆس كەمتر نەبێت.
دوای ئەو بڕیارە، دەیان هەزار كەس لە ئیستانبۆڵ رژانە سەر شەقام، ئیمامئۆغڵوش دژی بڕیارەكە وەستایەوە و بارودۆخی ئیستانبۆڵ تێك چوو.
ئاساییشی ئەو شارە، هەڵیكوتایە سەر ئیمامئۆغڵو لەگەڵ چەندان كەسایەتی تری سەر بە جەهەپە دەستبەسەر كران و ئەگەر هەیە شارەوانییەكەی قەیوم بكرێت.
سەركردەی پارتە سیاسییەكان دژی ئەو هەوڵەی حكوومەت وەستاونەتەوە و ئیدانەیان كرد، تونجەر بەكرخان، هاوسەرۆكی دەم پارتی دەڵێت: ”ئەوەی بەسەر ئیمامئۆغڵو و هاوڕێكانیدا هاتووە، كە دەستبەسەر كراون، بە ئاشكرا ئەمە پەلامارە بۆ ئیرادەی گەل، بۆیە وەكوو دەم پارتی، ئیدانەی ئەو پەلامارە دەكەین كە كراوەتە سەر ئیرادەی گەل.“