ئیسرائیل زنجیرە هێرشێکی ئاسمانیی نوێی بۆ سەر باشووری لوبنان دەستپێکرد

ڕۆژی پێنجشەممە، ئیسرائیل شەپۆلێکی نوێی هێرشی ئاسمانیی لە باشووری لوبنان دەستپێکرد و ناوچەکانی دەوروبەری نەبەتيیە و کفەر رومانی گرتەوە.
بەپێی ڕاپۆرتێکی پەیامنێران، ئەم هێرشانە زیاتر لە ١٥ جار دووبارە بوونەتەوە و زۆربەی کات ناوچە چۆڵەوانییەکان و ئەو گردانە کراونەتە ئامانج کە دەڕواننە سەر شارۆچکەکانی نەبەتيیە و کفەر رومان.
بەگوێرەی هەمان ڕاپۆرت، فڕۆکە جەنگییەکانی ئیسرائیل لە ئاسمانی بەیروتی پایتەختی لوبنانیشدا بینراون. هەندێک لەم هێرشانە ناوچە شاخاویی و دارستانە دوورەدەستەکانیان لە ناوەندە ئاوەدانەکان کردووەتە ئامانج. لە ئەنجامی ئەم هێرشانەدا، لانیکەم کەسێک گیانی لەدەست داوە و هەشت کەسی دیکەش برینداربوون.
لەلایەکی دیکەوە، ئاڤیخای ئەدرەعی، گوتەبێژی سوپای ئیسرائیل، لە تویتێکدا لە تۆڕی کۆمەڵایەتی ئێکس (تویتەری پێشوو) ڕایگەیاند: هێزی ئاسمانیی ئیسرائیل “ناوەندێکی بەڕێوەبردنی سیستەمی ئاگر و بەرگری”ی سەر بە حزبوڵڵای لوبنانی لە ناوچەی ئەلشەقیف کردووەتە ئامانج. بە گوتەی ناوبراو، ئەم پێگەیە بۆ فەرماندەییکردن و کۆنترۆڵکردنی سیستەمە چەکدارییەکانی حزبوڵڵا بەکارهاتووە.
ئەدرەعی هەروەها گوتی: ئەم پێگەیە بەشێک بووە لە پڕۆژەیەکی دوورمەودای ژێرزەمینیی حزبوڵڵا و ئێستا لە ئەنجامی هێرشە ئاسمانییەکانی ئیسرائیلدا لەکارکەوتووە. گوتەبێژی سوپای ئیسرائیل هەروەها هۆشداریداو”بوونی ئەم پێگەیە و چالاکییە تیرۆریستییەکانی پەیوەست پێوەی، پێشێلکارییەکی ئاشکرای ڕێککەوتنەکانی نێوان لوبنان و ئیسرائیلە.”