وەزارەتی بازرگانی ڕایدەگەیەنێت، هەر کۆمپانیایەک لەژێر ناوی جۆراوجۆر و چالاکییە جیاوازەکاندا، کاری (فۆرێکس) بکات دادەخرێت.
لە ڕوونکردنەوەیەکدا بەرێوەبەرایەتیی گشتیی تۆماری کۆمپانیاکان، لە وەزارەتی بازرگان بڵاوی کردەوە: “ئاگاداری هاووڵاتیان و خاوەن کۆمپانیا و سەرمایەداران دەکەینەوە کە بە هیچ شێوەیەک مامەڵە لەگەڵ ئەو کۆمپانیایانەدا مەکەن کە کاری ئاڵوگۆری ئەلیکترۆنی (فۆرێکس) دەکەن.”
ئاماژەی بەوەش داوە، ئەم کۆمپانیایانە مۆڵەتی فەرمی ئەنجامدانی ئەم چالاکیانەیان نیە.
بەرێوەبەرایەتیی گشتیی تۆماری کۆمپانیاکان، جەخت دەکاتەوە: “هەر کۆمپانیایەک لەژێر ناوی جۆراوجۆر و چالاکییە جیاوازەکاندا، تەنانەت چالاکی گشتگیریشدا کار بکەن لەم بوارەدا لە داهاتوویەکی نزیکدا دادەخرێن.”
ئاماژەی بەوەش داوە دوای بە دواداچونی لێژنەی تایبەتمەند بە پشت بەستن بە نووسراوی سەرۆکایەتیی دیوانی ئەنجوومەنی وەزیرانی هەرێمی کوردستان، کۆمپانیاکانی (فۆرێکس) قەدەغە کراون.