پارێزگاری بانکی ناوەندیی عێراق جەخت لە نەبوونی متمانەی خەڵكی عێراق بە سیستەمی بانکیی دەکاتەوە و دەڵێت: “80%ی پارەی عێراق لە دەرەوەی بانکەکانە و لە ماڵەكاندا هەڵگیراوە”.
عەلی عەلاق، پارێزگاری بانکی ناوەندیی عێراق، ڕایگەیاند: “80%ی دراوی عێراقی لە دەرەوەی بانكەكانە و لە ماڵەكاندا هەڵگیراوە، هۆكارەكەشی ئەوەیە كە خەڵك متمانەی بە سیستەمی بانكی لاوازە”.
ئاماژەی بەوەش دا: “پلانی چاکسازی بانکیی داندراوە، بۆ پتەوکردنی متمانە بە سیستمی بانکیی عێراق و چارەسەرکردنی گرفتەکان، بەتایبەت ئەو پارەی زۆرەی كە لە ماڵەكان هەڵگیراوە چۆن وا بكەین بێتە بانكەكان.”
پارێزگاری بانکی ناوەندیی عێراق ئاشكراشی كرد، 10% بانکەکان تێبینییان لەسەر پلانەکەی بانکی ناوەندی هەیە و دەشڵێت: “10 بانكی عێراقیش لەژێر هەڵوشانەوەن ئەوەیش بەهۆی بێ توانایی لە گەڕاندنەوەی پارەی پێشەکی هاوبەشانیان.
هەفتەی رابردوو مەزهەر محەمەد ساڵح، ڕاوێژکاری دارایی و ئابووریی سەرۆك وەزیرانی عێراق ڕایگەیاندبوو: “لە عێراقدا 100 تریلۆن دینار چاپ كراوە و ئەو بڕەش دەگرێتەوە كە دەستاو دەست دەكات لەنێوان خەڵك و بازاڕدا و بەشێكیشی دراوی یەدەگە”.
ئاشكراشی كرد، لە عێراقدا خەڵك كەمتر متمانەی بە بانك هەیە، گوتیشی: “88%ی دراوی عێراقی لە دەرەوەی بانكەكانە و لای خەڵكە و بەشێكی پارەی خەوتووە”.
جەختی كردەوە: “كۆمەڵگای عێراقی زیاتر پشت بە پارەی كاش دەبەستن و ئەوەش وەكو میرات ماوەتەوە و كەمتر پەنا بۆ بانك دەبەن، بۆیە دراوی عێراقی بە خراپی هەڵدەگیرێت و بەشێكی دراوەكە خراپ و دڕاوە”.