بنیامین نەتانیاهۆ، سەرۆک وەزیرانی ئیسرائیل، لەناوبردنی بازنەی سەرکردایەتیی حەماسی بە “مەرجی کۆتاییهێنانی شەڕ لە کەرتی غەززە” دانا و ڕایگەیاند، ئەم هەنگاوە ڕێگەی ئازادکردنی بارمتەکان خۆش دەکات.
نەتانیاهۆ گوتی: “لەناوبردنیان [سەرکردەکانی حەماس]، بەربەستی سەرەکیی بەردەم ئازادکردنی سەرجەم بارمتەکانمان و کۆتاییهاتنی شەڕ لادەبات.”
ئەم لێدوانە دوای ئەوە دێت، ئیسرائیل ڕۆژی سێشەممە، ٩ی ئەیلوول ، هێرشی کردبووە سەر باڵەخانەی نیشتەجێبوونی سەرکردەکانی حەماس لە دەوحەی پایتەختی قەتەر. سوپای ئیسرائیل ڕایگەیاندبوو سەرکردەکانی حەماس ڕاستەوخۆ بەرپرسیاری “کۆمەڵکوژییە دڕندانەکەی ٧ی ئۆکتۆبەر” و داڕشتنی شەڕی دژ بە ئیسرائیل بوون.
نەتانیاهۆ لە تۆڕی کۆمەڵایەتیی ئێکس، ڕەخنەی لەو وڵاتانە گرت کە هێرشەکەیان سەرکۆنە کردووە و نووسی: “سەرکردە تیرۆریستەکانی حەماس کە لە قەتەر دەژین، بایەخ بە خەڵکی غەززە نادەن. ئەوان ڕێگەیان لە هەموو هەوڵێکی ئاگربەست گرتووە بۆ ئەوەی شەڕەکە بۆ هەمیشە درێژە پێبدەن.”