بەڕێوەبەرایەتی ئاسایشی هەولێر دەستگیركردنی سەرجەم ئەو تۆمەتبارانەی راگەیاند كە لە چەند رۆژی رابردوودا لەسەر میرات هەڵیان كوتابووە سەر ماڵی خاڵەكانیان.
ئاسایشی هەولێر رایگەیاند: دوای ئەنجامدانی بەدواداچوون لەلایەن هێزەکانمان و بە فەرمانی دادوەری لێکۆڵینەوەی ئاسایشی هەولێر، چوار تۆمەتبارمان دەستگیر کرد.
راشیگەیاند: ناوی تۆمەتبارەكان بریتییە لە (ش، م، ی) و (ع، س، م) و (ن، أ، پ) و (ل، م، ک)، هەروەها لە ناویاندا تۆمەتباری سەرەکی (ش، م، ی) هەیە.
لەبارەی هۆكاری رووداوەكە ئاسایش رایگەیاند: لەسەر پارەو میرات بۆتە کێشەی کۆمەڵایەتی لەنێوان تۆمەتبارەكان لەگەل ماڵی خاڵەکانیان، بەو هۆیەوە سێ تۆمەتبارەکەی تری، کەناویان لەسەرەوە هاتوە ، چەند جارێک هاندراون لەبەرامبەر بڕێک پارە هەڵبکوتنە سەر ماڵی ئەو خاڵانەیان و هەروەها چەکی بێ مۆڵەتیش بەکار هاتووە و تەقەیان لە ماڵیی خاڵەکانیان کردووە.
ئاسایشی هەولێر هەروەها ئاشكرای كرد كە دواین جار لەلایەن تۆمەتبار (ع، س، م) هەوڵی سوتاندنی ئۆتۆمبێڵی خاڵەكەی درابوو لە گەڕەکی موفتی شاری هەولێر.