وەزارەتی بەرگریی تورکیا لە کۆنفرانسی ڕۆژنامەوانیی هەفتانەیدا ڕایگەیاند، عەزیز ناسرزادە، وەزیری بەرگریی ئێران، سەردانی تورکیای کردووە و لەگەڵ یەشار گولەر، هاوتا تورکیاییەکەی کۆ بووەتەوە.
بەپێی ڕاگەیەندراوەکە، لە کۆبوونەوەکەدا هەردوو لا جەختیان لەسەر پەرەپێدانی هەماهەنگی بۆ پاراستنی ئاسایشی سنوورە هاوبەشەکانیان، بەتایبەتی لە بواری بەرەنگاربوونەوەی تیرۆر و کۆچی نایاسایی، کردووەتەوە. وەزارەتەکە ئێرانی وەک وڵاتێکی “دراوسێ و برا” ناو بردووە کە سنوورێکی درێژی هاوبەشیان پێکەوە هەیە.
هاوکات، وەزارەتی بەرگریی تورکیا ئاماژەی بە دۆخی سووریا کردووە و ڕایگەیاندووە، ئەنقەرە “بە هەستیارییەوە” چاودێریی هەوڵەکانی تێکەڵکردنی هێزەکانی سووریای دیموکرات (هەسەدە) بە سوپای سووریا و جێبەجێکردنی ڕێککەوتنی نێوان هەسەدە و دیمەشق دەکات.