لە ئەڵمانیا، ژمارەی تووشبووان بە ڤایرۆسی کۆرۆنا بە شێوەیەکی بەرچاو بەرز بووەتەوە، لە کاتێکدا پێشتر ئەم ژمارەیە زۆر کەم بوو. پەیمانگای ڕۆبێرت کۆخ ڕایگەیاندووە کە لە ماوەی یەک هەفتەدا، لە ٦ تا ١٢ی تشرینی یەکەم، ٦٤٤٠ حاڵەتی تووشبوون بە کۆڤید-١٩ تۆمار کراوە، لە کاتێکدا هەفتەی پێشتر ٣٨٥٠ حاڵەت بووە.
بەپێی ڕاپۆرتی پەیمانگای ڕۆبێرت کۆخ، ڕێژەی بڵاوبوونەوەی کۆڤید-١٩ لە ئێستادا ٦٠٠ حاڵەتی تووشبوونە بۆ هەر ١٠٠ هەزار کەس، لە کاتێکدا هەفتەی پێشتر ٤٠٠ حاڵەت بووە.
ئێستا لە ئەڵمانیا پشووی پاییزەیە و قوتابخانە و باخچەکانی ساوایان داخراون، بۆیە ئەگەری هەیە ژمارەی تووشبوون بە ڤایرۆسەکە کەم بکاتەوە.
بەپێی لێکۆڵینەوەیەک کە لە کۆتایی مانگی ئەیلوولدا ئەنجام دراوە، ژێر جۆرەکانی XFG کە بە “ستراتوس”یش ناسراوە، بە ڕێژەی ٧١%، لە ئێستادا باوترین جۆری ڤایرۆسەکەیە لە ئەڵمانیا.
ستراتوس یەکێکە لە ژێر لقەکانی ئۆمیکرۆن کە ڤایرۆسەکانی بە شێوەیەکی سەرەکی لە بەشەکانی سەرەوەی کۆئەندامی هەناسەدا زۆر دەبن و بۆیە دەتوانن خێراتر بڵاو ببنەوە. بەڵام، شارەزایان پێیان وایە کە ژێر جۆری XFG مەترسییەکی زیاتر بۆ تەندروستیی گشتی دروست ناکات.
سەرەڕای بەرزبوونەوەی ژمارەی تووشبووان لە ماوەی ٦ تا ١٢ی تشرینی یەکەم، بەڵام بە بەراورد بە ساڵی ڕابردوو، ژمارەی تووشبووان نزیکەی نیوە بووەتەوە. لە ناوەڕاستی تشرینی یەکەمی ٢٠٢٢دا نزیکەی ١١ هەزار و ٥٧٠ کەس تووشی ڤایرۆسی کۆرۆنا ببوون.
لە کاتی لووتکەی بڵاوبوونەوەی کۆرۆنا لە تشرینی یەکەمی ٢٠٢٠دا، تەنها لە یەک ڕۆژدا زیاتر لە حەوت هەزار حاڵەتی نوێی تووشبوون دەستنیشان کرا و لە کۆتایی تشرینی یەکەمی هەمان ساڵدا ١٩ هەزار حاڵەتی تووشبوون لە یەک ڕۆژدا تۆمار کرا.