ئەکرەم ئیمامئۆغڵو، سەرۆکی شارەوانیی ئیستەنبوڵ، ڕایگەیاند کە حکوومەتی تورکیا سەلاحەدین دەمیرتاش، هاوسەرۆکی پێشووی هەدەپە، وەک کارتێکی فشار دژی دەم پارتی و پەکەکە بەکار دەهێنێت و ئامادە نییە ئازادی بکات، سەرەڕای بڕیاری دادگای مافەکانی مرۆڤی یەکێتیی ئەورووپا.
ئیمامئۆغڵو لە پەیامێکدا لەسەر ئازاد نەکردنی سەلاحەدین دەمیرتاش ڕایگەیاندووە، سەرەڕای هەبوونی بڕیاری دادگای مافەکانی مرۆڤی یەکێتیی ئەورووپا، بەڵام بەداخەوە هەتا ئێستاش دەمیرتاش ئازاد نەکراوە. ئاشکراشی کردووە کە ئامانجی دەسەڵات لەمە ئەوەیە دەمیرتاش و فیگەن یوکسەکداغ وەک کارتێکی فشار لە دانوستاندنەکانی لەگەڵ دەم پارتی و پەکەکەدا بەکار بهێنێت، لەبەر ئەوەش ئازادیان ناکات.
ئیمامئۆغڵو ستایشی هەڵوێستی دەم پارتی لە بەرانبەر خۆی و شارەوانیدارەکانی دیکەی جەهەپەی کرد کە گیرابوون و ڕایگەیاند، بەڕاستی لەو ڕۆژەوەی من و هاوڕێکانم گیراوین، دەم پارتی بەردەوام پشتیوانیی ئێمەی کردووە، ئەمەش جێگەی ڕێزە.
