عەزەدین سەعدو
پارتی وەکو پارتەکا دیموکرات خواز، باوەریەکا تەمام ب ھندێ ھەیە کو (گەل ژێدەرێ دەستھەلاتێیە)، و ئەڤ پرنسیپە دپروگرامێ خودا دمادەیێ ٢٧ دا تەسبیت کریە. ل سەرھلدانا پیروزا ١٩٩١ ل باژێرێ کوێ جەنابێ رێزدار (سەروک بارزانی) دگوتارا خودا کەرەم کر: (دڤێت ھەلبژارتن ل کوردستانێ بھێنە ئەنجامدان، و مە نە ڤێت چ ێیغەیەکێ دەستھەلاتێ لسەر مللەتێ خو فەرز کەین).
پارتێن کوردستانی لگورەی وان یاسا و رێنمایێن وی سەردەمی یێن ژ لایێ بەرەیێ کوردستانی ڤە ھاتینە دانان و دەرئێخستن بریار دان ل ١٩/ ٥/ ١٩٩٢ ھەلبژارتن ل کوردستانێ بھێنە ئەنجامدان، د وان ھەلبژارتنان دا پارتی (٥١%) یا دەنگان بدەستخوڤە ئینان و ئێکەتی نشتیمانی کوردستان دگەل حزبا زەحمەتکێشانا کوردستانێ (٤٩%) بدەستخوڤە ئینان، ئێکەتی ب ئەنجامێن ھەلبژارتنا رازی نە بو، و لدووماھیێ دەست ب شەری کر، وی شەری گەلەک زیان گەھاندنە ھەرێما کوردستانێ تاکو رێکەفتنا واشنتون ل ١٧/ ٩/ ١٩٩٨ ھاتییە ئیمزا کرن.
ل ٢٦/ ٥/ ٢٠٠١ ل ھەر دوو پارێزگەھێن ھەولێر و دھوک پارتی دگەل وان پارتێن دی یێن ل ڤان ھەر دوو پارێزگەھان ھەلبژارتن بو جڤاتێن باژێرڤانییان ئەنجامدان، دڤان ھەلبژارتنان دا پارتی دا دیار کر کو ھەر دەم دگەل ھەلبژارتنانە و دڤێت دەستھەلات ب رێکا دەنگدانێ بھێتە ھەلبژارتن، و پشتی پروسیسا رزگارکرنا عێراقێ، ل ھەلبژارتنێن سالا ٢٠٠٥ و ٢٠٠٩ پارتی و ئێکەتی ب ئێک لیست ل کوردستان و عێراقێ بەشداری ھەلبژارتنان بوون، ئەڤ پێنگاڤە لسەر بناغێ (رێکەفتنا ئیستیراتیجی) بو، ئەوا دنافبەرا پارتی و ئێکەتی دا ھاتیە ئەنجامدان.
ل سالا ٢٠٠٩ ل ھەلبژارتنێن سەروکاتییا ھەرێمێ و پەرلەمانێ کوردستانێ رێژا (٧٠%) یا دەنگدەرێن کوردستانێ دەنگ ب “سەروک بارزانی” دان، ئەڤە ژی سەرکەفتنەکا مەزن بو، بو پارتی و رێبازا (بارزانیێ نەمر)، و ڤیانا خەلکێ کوردستانێ دگەل “سەروک بارزانی”، پارتی و ئێکەتی ھەر دووکان پێکڤە (٥٧%) بدەستخوڤە ئینان.
ل سالا ٢٠١٣ ل ھەلبژارتنێن پەرلەمانێ کوردستانێ یێن خولا چوارێ ژ سەرجەمێ (١١١) کورسیێن پەرلەمانی پارتی (٣٨) کورسی بدەستخوڤە ئینان، و پارتی بو ھێزا ئێکەم ل کوردستانێ، و ل سالا ٢٠١٨ ل ھەلبژارتنێن جڤاتا نوێنەران یێن عێراقێ پارتی بو حزبا ئێکەم لسەر ئاستێ عێراقێ؛ و ل سالا ٢٠١٨ ل ھەلبژارتنێن پەرلەمانێ کوردستانێ یێن خولا پێنچێ ژ سەرجەمێ (١١١) کورسیێن پەرلەمانی پارتی (٤٥) کورسی بدەستخوڤە ئینان، و ل سالا ٢٠٢٤ ل ھەلبژارتنێن پەرلەمانێ کوردستانێ یێن خولا شەشێ ژ سەرجەمێ (١٠٠) کورسیێن پەرلەمانی پارتی (٣٩) کورسی بدەستخوڤە ئینان، ل ھەر شەش خولێن ھەلبژارتنێن پەرلەمانێ کوردستانێ پارتی بو ئێکەم، و لسەر ئاستێ عێراقێ ژی ل ھەر پێنچ خولێن ھەلبژارتنێن جڤاتا نوێنەران یێن عێراقێ ژ ھێزێن ئێکەمە و ھێزەکا ھەرە کارا و مەزنە.
بو ھەلبژارتنێن خولا شەشێ یا جڤاتا نوێنەران کو بریارە ل ١١/ ١١/ ٢٠٢٥ بھێنە ئەنجامدان، خەلکێ کوردستانێ پارتی ھەلبژێرن، چونکی پارتی ھێزا پاراستنا کوردستانێ یە و ئەڤە ژی یا دیارە ھەر ژ سالا ١٩٩١ تاکو نوکە، کا پارتی چەند قوربانی داینە و چەند بەرەڤانی ژ کوردستانێ کرییە، و ل ئاڤەدانیێ پارتی ب بەرنامەیێن خو شیاییە خزمەتەکا باش پێشکێشی خەلکێ کوردستانێ بکەت، ئاڤەدانییا ل ھەولێرێ، دھوکێ، زاخو، سوران … ھتد، بەلگەنە بو سەلماندنا ڤێ راستیێ، و لسەر ئاستێ عێراقێ پارتی وەکو حزب و ل حکومەتا ھەرێمێ ژی نوێنەرا راستەقینەیا کورد و کوردستانێ یە، و ئەڤە ل کەتواری ھاتییە سەلماندن و یا دیارە، و لسەر ئاستێ نێڤدەولەتی ھەر ژ سالا ١٩٩١ تاکو نوکە پارتی وەکو حزب؛ و ل ھەر دوو سەروکاتیێن حکومەت و ھەرێما کوردستانێ نوێنەراتییا راستەقینەیا گەلێ کوردستانێ کریە و بوویە ھێز و نوێنەرا کوردستانییان ل جیھانێ.
ئەڤە ھەمی ژ وێ یەکێ ھاتییە کو “گەل ژێدەرێ ھێز و دەستھەلاتێیە”، و پارتی باوەرییەکا ھەرە موکوم ب ڤێ یەکێ ھەیە، ئەڤچا بو ب ھێز بوونا پارتی فەرە ل ڤێ دەنگدانێ ل روژا ١١/ ١١/ ٢٠٢٥ ئەم ھەمی پێکڤە پارتی ھەلبژێرین، ھەر دەنگەک ھێزەکە بو پارتی، بەرەف سەرکەفتن و ئێکەم بوونا پارتی د ھەلبژارتنان دا دەنگی پێ بدەن.