ئەمڕۆ سێشەممە، 18ـی تشرینی دووەمی 2025، کەمال خەرازی، ڕاوێژکاری ڕێبەری ئێران عەلی خامنەیی ڕایگەیاند، ئێران ئامادەیە پێشنیازەکانی ڕووسیا و چین دەربارەی هاوکارییکردنی ئاژانسی نێودەوڵەتی وزەی ئەتۆمی تاوتوێ بکەن.
ئاژانسی هەواڵی ‘سپۆتنیک’ـی ڕووسی بڵاویکردەوە، لەوەڵامی پرسیارێکی ڕۆژنامەوانان دەربارەی نێوەندگیری چین و ڕووسیا بۆ دووبارە دەستپێکردنەوەی هاوکارییەکانی ئاژانسی وزەی ئەتۆمی، کەمال خەرازی گوتی: ئەگەر پڕۆژەیەکی لەو شێوەیە پێشنیاز بکرێت، لێکۆڵینەوەی لەسەر دەکەین.
بەڕێوەبەری گشتیی ئاژانسی نێودەوڵەتی وزەی ئەتۆمی، ڕافائیل گرۆسی، گوتبووی: ئێران دەبێت ئاستی هاوکارییەکانی لەگەڵ پشکنەرانی نەتەوە یەکگرتووەکان بەرەوپێش ببات بۆ ئەوەی گرژییەکان لەگەڵ وڵاتانی ڕۆژئاوا پەرە نەسێنێت.
لە 13ـی حوزەیرانی ڕابردوو، ئیسرائیل هێرشی ئاسمانی کردە سەر تاران و شوێنە سەربازییەکان و دامەزراوە ئەتۆمییەکانیان بۆردومان کرد، کە دیارترینیان دامەزراوەی سەرەکی پیتاندنی یۆرانیۆمی نەتەنز و فۆردۆ بوو.
لە ئەنجامی هێرشەکانی ئیسرائیل ژمارەیەک زانای ئەتۆمی، فەرماندە و بەرپرسانی باڵای سەربازیی ئێرانی کوژران، دیارترینیان حوسێن سەلامی فەرماندەی سوپای پاسداران، محەممەد باقری، سەرۆک ئەرکانی سوپای پاسداران و ئەمیر عەلی حاجی زادە، فەرماندەی هێزی ئاسمانی سوپای پاسداران بوون.