وێنەیەکی نوێی بەرهەمهێنەری بەناوبانگی مۆسیقا، شۆن “دیدی” کۆمزی تەمەن ٥٦ ساڵ، لەناو زیندان بڵاوکرایەوە کە تێیدا بە ڕوخسارێکی تەواو جیاواز دەردەکەوێت. ئەم وێنەیە لە کاتی بەسەربردنی سزاکەی لە زیندانێکی ئاسایشی سنووردار لە نیوجێرزی گیراوە، دوای ئەوەی بە تۆمەتی لەشفرۆشی حوکم درا.
لە وێنەکەدا، کۆمز بە قژێکی سپی و ڕیشێکی ئاڵۆسکاوەوە دەبینرێت و کراسێکی شەرابیی زیندانی لەبەردایە. ئەم دەرکەوتنەی تەواو پێچەوانەی ستایلە ناسراوەکەیەتی لە ڕۆژانی ناوبانگیدا، کە هەمیشە بە قات و چاویلکەی گرانبەها و قژی ڕەشەوە دەردەکەوت.
کۆمز لە تەممووزدا بە چوار ساڵ و دوو مانگ زیندانیکردن حوکم درا و لە ٣٠ی ئۆکتۆبەر لە زیندانی میترۆپۆلیتان لە بڕۆکلینەوە گواسترایەوە بۆ دامەزراوەی چاکسازیی فیدراڵی فۆرتێکس لە نیوجێرزی.
جودا ئینجلمایەر، گوتەبێژی کۆمز، ڕاگەیاند، کۆمز پابەندە بە وازهێنان لە ماددە هۆشبەرەکان و کار لەسەر چاکبوونەوەی خۆی دەکات. ناوبراو کارێکی لە کەنیسەی زیندانەکە وەرگرتووە و بەشداریی لە پرۆگرامێکی شیاندنەوە کردووە، کە ڕەنگە ببێتە هۆی کەمکردنەوەی ماوەی سزاکەی بۆ ماوەی ساڵێک.
هەر لەناو زینداندا، کۆمز پرۆگرامی فێرکاریی “یاریی ئازاد لەگەڵ دیدی” دەستپێکردووە بۆ فێرکردنی زیندانییەکانی دیکە لەسەر کاری بازرگانی و بەهێزکردنی کەسایەتییان. سەرەڕای ئەمەش، کۆمز ڕووبەڕووی هەندێک کێشە بووەتەوە، وەک ئەنجامدانی پەیوەندییەکی تەلەفۆنیی سێقۆڵی کە یاساکانی زیندانی پێشێل کردووە.