لە میانی پێنجەمین خولی فێستیڤاڵی نێودەوڵەتیی فیلمی دەریای سوور بۆ ساڵی ٢٠٢٥، ئاهەنگی دابەشکردنی خەڵاتەکانی گۆڵدن گڵۆب بەڕێوەچوو.
لەم ڕووداوەدا خانمە ئەکتەری تونسی (هند سەبری) خەڵاتی “عومەر شەریف”ـی پێ بەخشرا، هەروەها ئەستێرەی بۆلیوود (عالیا بەت) خەڵاتی “گۆڵدن گڵۆب هۆرایزن”ی بۆ ئەمساڵ بەدەست هێنا.
ئاهەنگەکە بە ئامادەبوونی ژمارەیەک لە ئەستێرە جیهانی و عەرەبییەکان وەک سەلمان خان، ئیدریس ئێلبا و شون بەیکەر بەڕێوەچوو.
هێلین هۆنی، سەرۆکی خەڵاتەکانی گۆڵدن گڵۆب ڕایگەیاند کە پێدانی خەڵاتی عومەر شەریف بە هند سەبری وەک ڕێزلێنانێکە بۆ کارە مرۆیی و هونەرییەکانی کە ڕەنگدانەوەی هێزی سینەمای عەرەبییە.
جومانا ڕاشد، سەرۆکی دەستەی ئەمینداری دامەزراوەی دەریای سوور، ئاماژەی بەوە دا کە ئەم هاوبەشییە لەگەڵ گۆڵدن گڵۆب دەرفەتێکە بۆ ناساندنی بەهرەکان لە جیهانی عەرەبی و ئاسیا و ئەفریقا بە ئاستی جیهانی.