پەرلەمانی ئێران لەم هەفتەیەدا کۆبوونەوەیەکی چاودێریی گرنگ ئەنجام دەدات دەربارەی دۆخی خراپی ئابووری و بەرزبوونەوەی بەردەوامی نرخی کاڵا پێداویستییەکان، لەگەڵ هەڕەشەی لێپێچینەوە لە وەزیران گەر ڕێگەچارەی گونجاو نەدۆزرێتەوە. ئەم هەڕەشەیە لە کاتێکدایە وڵات بە قەیرانێکی ئابووریی قووڵ و هەڵاوسانێکی زۆردا تێدەپەڕێت.
محەمەد باقر قاڵیباف، سەرۆکی پەرلەمانی ئێران، ڕۆژی یەکشەممە، ٢١ی کانوونی یەکەمی ٢٠٢٥، ڕایگەیاند بەرزبوونەوەی ڕۆژانەی نرخی کاڵا پێداویستییەکان بووەتە یەکێک لە نیگەرانییە سەرەکییەکانی خەڵک. ئەو ئاماژەی بەوە کرد، بەرزبوونەوەی نرخی دراوی بیانی و زێڕ وەک هۆکارێک بۆ هەڵاوسانێکی فراوانتر سەیر دەکرێن. قاڵیباف گوتی پەرلەمان چەندین کۆبوونەوەی چاودێریی ئەنجام داوە بە بەشداریی وەزیرانی ئابووری، کەرتی کشتوکاڵ، پیشەسازی و هەروەها سەرۆکانی ڕێکخراوی بەرنامە و بودجە و بانکی ناوەندی. ئەم کۆبوونەوانە تیشکیان خستووەتە سەر ڕێگریکردن لە کەمبوونەوەی توانای کڕینی خەڵک، جێبەجێکردنی پلانی کارتی خۆراک و بەڕێوەبردنی ناجێگیری لە بازاڕی دراودا.
سەرۆکی پەرلەمانی ئێران هۆشداری دا، گەر ئەم ڕێوشوێنانە ئەنجامی نەبێت، ئەوا نوێنەرانی پەرلەمان ناچار دەبن دەست بە پرۆسەی لێپێچینەوە لە وەزیران بکەن. ئەمە یەکەم جار نییە پرسی لێپێچینەوە لە وەزیران دەوروژێنرێت. پێشتر، لە ئازاری ٢٠٢٥، پەرلەمان دەنگی بە لێپێچینەوە و لەکارلابردنی عەبدولناسڕ هیمەتی، وەزیری ئابووری، دا بەهۆی بەرزبوونەوەی نرخی دۆلار و گرانیی کاڵا سەرەکییەکان.
ئێران ساڵانێکە ڕووبەڕووی هەڵاوسانێکی زۆر، بێکاری و دابەزینی بەهای دراوی نیشتمانیی بووەتەوە، کە کاریگەریی قورسی لەسەر ژیانی ڕۆژانەی هاووڵاتییان داناوە. ڕاپۆرتەکان ئاماژە بەوە دەکەن، ئابووریی ئێران لە ساڵی ٢٠٢٥دا ڕووبەڕووی کێشەی پێکهاتەیی قووڵ دەبێتەوە. هاوکات، مەزەندە دەکرێت ڕێژەی هەڵاوسان لە ساڵی ٢٠٢٥دا لە سەرووی ٤٣٪ بێت.
فاتیمە موهاجیرانی، گوتەبێژی حکوومەت، ڕایگەیاند چاودێریی حکوومەت مافی پەرلەمانە، بەڵام وەرگرتنەوەی متمانە لە هەر وەزیرێک ڕێکخستنەوەی کاروباری وەزارەتەکە بۆ ماوەی شەش مانگ بۆ ساڵێک دوادەخات. ئەو هەروەها دووپاتی کردەوە تیمی ئابووریی حکوومەت بە هەماهەنگی لەگەڵ بانکی ناوەندی، وەزارەتی ئابووری، ڕێکخراوی بەرنامە و بودجە و لەژێر چاودێریی ڕاستەوخۆی سەرۆک کۆماردا کار دەکات.
