ئەمریکا شەپۆلێکی نوێی سزاکانی دژی چەند کەس و دامەزراوەیەکی پەیوەندیدار بە ئێرانەوە خستە گەڕ. وەزارەتی گەنجینەی ئەمریکا ڕایگەیاند، ١٠ کەس و دامەزراوەی پەیوەندیدار بە ئێرانی، بەهۆی بازرگانیکردن بە چەکوچۆڵەوە لەنێوان ئەو وڵاتە و ڤەنزوێلادا، خستوونەتە لیستی سزاکانییەوە.
مەبەست لەم کارە سنووردارکردنی پەرەپێدانی چەکوچۆڵ و ڕێگریکردنە لە هەناردەی نایاساییان بۆ وڵاتانی دیکە. بەپێی ئەم سزایانە، هەموو ئاڵوگۆڕێکی بازرگانی لەنێوان لایەنی ئێرانی و ئەمریکایی پەیوەندیدار بەم بابەتەوە ڕادەگیرێت.
پێشتریش ئەمریکا سزاى خستبووە سەر ١٧ دامەزراوە و لایەن و کەشتی، کە ڕۆڵی سەرەکییان لە فرۆشتن و هەناردەی نەوتی خاوی ئێراندا هەبوو. لەم پەیوەندییەدا، وەزارەتی گەنجینەی ئەمریکا ڕایگەیاند، ئێرانییەکان نەوتەکەیان لە وڵاتە جیاوازەکاندا بە ڕێگەی شاراوە دەفرۆشن.