ڕۆژی یەکشەممە، 4-1-2026، موقتەدا سەدر، ڕێبەری ڕەوتی سەدر، لە پەیامێکدا ڕایگەیاند،ئەو ڕووداوەی لە (کاراکاس) بە دەستی (تڕەمپ) ڕوویدا، پەیامێکی ڕوونە دەربارەی (جیهانگیری) کە هەمیشە ئامانجی زلهێزی جیهانی بووە و هەر وایشە.
گوتیشی، ئەمە پەیامێکە بۆ هەموو نەیاران و دژبەرانی سیاسەتەکانی ئەمەریکا، تەنانەت بۆ زۆربەی خەڵک بە گشتی، بە تایبەت کاتێک سەرنج دەدەینە ئەوەی کە کردەی گرتن و دەستگیرکردنەکەی تڕەمپ ڕەنگە پێچەوانەی یاسا نێودەوڵەتییەکان بێت.
کەواتە، ئەمە پەیامێکە بۆ هەموو ڕێکخراوە نێودەوڵەتییەکان و یاسا نێودەوڵەتییەکان، لەوانە ئەنجومەنی ئاسایش، نەتەوە یەکگرتووەکان، دادگای نێودەوڵەتی، مافەکانی مرۆڤ و هەموو لایەنەکانی تر.
سەرەڕای هەموو ئەمانە، ئەو ڕووداوە پەیامێکی ئاسمانیشی تێدایە، لە ڕووی ئاسانی ڕووخانی دەسەڵات و نەمان و لەناوچوونی ئەو فەرمانڕەوایانەی کە سامان و گەندەڵییەکانیان لە گەلەکەیان و لە ئازارەکانیان دووریان خستنەوە، ئەمەش وای کرد ئەو گەلانە ببنە گەلی چەوساوە و سەرکوتکراو.
دەشڵێت، ئەگەر ئەمڕۆ ڕووخانی مادورۆ و حوکمەکەی بە دەستی زۆردار بێت. ئەوا ڕووخانی زۆرداران و گەندەڵکاران بە هەمان شێوە یان بە شێوەی تر دەبێت کە تەنها خوا دەیزانێت.
لەکۆتایی پەیامەکەی دا ئاماژەی دا، خودایە زۆرداران بە زۆردارانەوە سەرقاڵ بکە و ئێمە بە سەلامەتی لە نێوانیاندا ڕزگار بکە، خوایە، جیاوازی بخەرە نێوان ئێمە و ستەمکاران، گەندەڵکار و ئەوانەی کە بە تیرۆر و سەربڕین زەوییان پڕ لە فەسادی کردووە..