ژمارەیەک پارتی کوردیی باکووری کوردستان هێرشی سوپای عەرەبیی سووریایان بۆ سەر گەڕەکە کوردییەکانی حەلەب بە توندی شەرمەزار کرد. داوایان لە هێزە نێودەوڵەتییەکان کرد بۆ پاراستنی خەڵکی مەدەنی ڕێوشوێن بگرنە بەر.
پارتی هەرێمە دیموکراتییەکان (DBP)، دەستپێشخەریی یەکێتیی دیموکراتی، پارتی کۆمۆنیستی کوردستان، پارتی دیموکراتی کوردستان لە تورکیا، پارتی ئازادی و کۆمەڵەی کوردانی دیموکرات و شۆڕشگێڕ (DDKD)، لە بەیاننامەیەکی هاوبەشدا هێرشکردنە سەر هەردوو گەڕەکی شێخ مەقسوود و ئەشرەفیەی شاری حەلەبیان شەرمەزار کرد.
ئاماژەیان بەوە کرد کورد دەیان ساڵە لەسەر خاکی خۆی ڕووبەڕووی هێرش و توندوتیژی دەبێتەوە، مافە بنەڕەتییەکانیان قبووڵ ناکرێت و ئەمەش جارێکی دیکە لە شێخ مەقسوود و ئەشرەفیە دووبارە بووەتەوە.
پارتە کوردییەکان ڕوونیان کردەوە ئامانجی هێرشەکان لەناوبردنی دەستکەوتەکانی کوردە و داوا لە هێزە نێودەوڵەتییەکان کرا ڕێگری لە کۆمەڵکوژیی خەڵکی مەدەنی بکەن.