جێگری فەرمانگەی شوێنەواری پارێزگای ئێسفەهان بە ڕۆژنامەی (شەرق)ی ڕاگەیاند، لە هێرشەکانی ڕۆژی دووشەممەی ئیسرائیل بۆ سەر شارەکە، زیان بە چەند بناغە و شوێنەوارێکی مێژوویی و کولتووریی ناودار گەیشتووە.
بە گوتەی ڕوحوڵڵا سەیدولعەسگەری، لەو هێرشانەدا هەریەک لە کۆشکی (چهلستون)، عەممارەتی (ڕەکیبخانە)، تالاری (تەیمووری) و تالاری (ئەشرەف) زیانیان پێ گەیشتووە و شووشەکانی کۆشکی (عالی قاپو)ش شکاون. پێدەچێت بینای پارێزگاریی ئێسفەهان کە تالاری ئەشرەف بەشێکە لێی، ئامانجی سەرەکیی هێرشەکە بووبێت.
ئەم هێرشانە لە کاتێکدایە کە سوپای ئیسرائیل پێشتر ڕایگەیاندبوو، تاران و ئێسفەهان و ناوچەکانی باشووری ئێران ئامانجی هێرشەکانیانن. هەفتەی ڕابردووش کۆشکی (گوڵستان) لە ناوەندی تاران بەهۆی هێرشە ئاسمانییەکانەوە زیانی بەرکەوتبوو.
هەواڵی پێشوو