لە کاتێکدا کە بەهۆی بارودۆخی تایبەتی ناوچەکە و لەپێناو پاراستنی سەلامەتی گشتی، بڕیاری بەڕێوەچوونی یارییەکانمان بەبێ ئامادەبوونی هاندەران داوە؛ دەمانەوێت جەخت بکەینەوە کە وەرزش لە بنەڕەتدا پەیامی ئاشتی، پێکەوەژیان و قبوڵکردنی ئەنجامەکانە بە ڕۆحێکی وەرزشییانە.
ئێمە پێمان وایە یاریگاکان دەبێت تەنیا شوێنی نمایشی بەهرە و ڕەوشتبەرزی بن، نەک ببنە گۆڕەپانی شەڕ و ئاژاوەگێڕی. بەداخەوە، ئەو دیمەنانەی لەم دواییانەدا لە هەندێک یاریگاکان بینران، لادانێکی مەترسیدار بوون لە پرەنسیپە ڕەسەنەکانی وەرزش.بۆیە، لەپێناو پاراستنی گیانی یاریزانان، ناوبژیوانان و سەرجەم وەرزشکاران، وەک ئەرکێکی ئەخلاقی و یاسایی، ئەم هەنگاوەمان گرتووەتە بەر بۆ ئەوەی ڕێگری بکەین لە هەر لێکەوتەیەکی نەخوازراو و دووبارەبوونەوەی ئەو ئاژاوانە ، ئەم بڕیارانەی خوارەوەمان دا:
بڕیارەکان و هەڵوێستی نوێمان:
1- ڕاگرتنی خول: بڕیارماندا بە ڕاگرتنی سەرجەم یارییەکانی خولی پلە یەکی کوردستان تا کاتێکی نادیار. ئەمە هەنگاوێکی پێویستە بۆ پێداچوونەوە بە بارودۆخەکان و دڵنیابوونەوە لە سەلامەتی گشتی.
2- سزای توند: لەمەودوا هەر یانە، یاریزان، یان هاندەرێک ببێتە هۆکاری تێکدانی کەشی وەرزشی، ڕووبەڕووی سزای وا توند دەبێتەوە کە بگاتە ئاستی سڕکردنی هەمیشەیی و دەرکردن لە خولەکان. ئێمە یاریگای چۆڵمان پێ باشترە لە یاریگایەک کە تێیدا بێڕێزی بە شکۆی مرۆڤەکان بکرێت.
3- قەدەغەکردنی چەک: بەهیچ جۆرێک جێگای قەبوڵکردن نییە و ڕێگە نادرێت چەک بێتە ناو یاریگاکانەوە، تەنانەت پیاوانی ئەمنیش دەبێت بەبێ چەک لە ناوەوەی گۆڕەپان و یاریگادا ئەرکەکانیان جێبەجێ بکەن.
4- بەرپرسیارێتی یانەکان: یانەکان بەرپرسی یەکەمن لە ڕەفتاری هاندەران و ستافەکانیان. هەر کاتێک کۆنترۆڵی یاریگاکەتان بۆ نەکرا، دەبێت باجە یاسایی و وەرزشییە قورسەکەی بدەن.
پەیامێک بۆ هەمووان:
داوا لە سەرۆک یانەکان، ڕاهێنەران و کاپتنەکان دەکەین ببنە پێشەنگ لە چاندنی تۆوی برایەتی. وەرزش بردنی تێدایە و دۆڕانیشی تێدایە، ئەوەی ناتوانێت بە شکۆوە بدۆڕێت، شایستەی ئەوە نییە بە شانازییەوە بباتەوە. ڕێگە نادەین کەمینەیەکی ئاژاوەگێڕ ناوی وەرزشی کوردستان لەکەدار بکەن، چونکە پاراستنی ئاسایشی یاریگاکان هێڵی سوورە و هیچ سازشێکی لەسەر ناکەین.
یەکێتی تۆپی پێی کوردستان
هەینی 13-3-2026