جۆزێف عۆن، سەرۆککۆماری لوبنان، ئەمڕۆ یەکشەممە، 5-4-2026، نوێترین ئاماری زیانە مرۆیی و ماددییەکانی وڵاتەکەی لە ئەنجامی شەڕی نێوان حزبوڵڵا و ئیسرائیل ڕاگەیاند و ئاماژەی بەوە کرد، تا ئێستا هەزار و 400 کەس کوژراون و چوار هەزار کەسی دیکەش بریندار بوون.
سەرۆککۆماری لوبنان لە کۆنگرەیەکی ڕۆژنامەوانیدا ڕایگەیاند، “جگە لە کوژراو و بریندارەکان، ملیۆنێک و 200 هەزار کەس ئاوارە بوون و هەزاران خانوو و یەکەی نیشتەجێبوون لە سەرتاسەری وڵاتدا وێران کراون.”
جۆزێف عۆن بە توندی سەرکۆنەی هێرشەکانی ئیسرائیلی بۆ سەر هاووڵاتیانی مەدەنی کرد و تەلئەڤیڤی تۆمەتبار کرد بەوەی کە “ڕێز لە یاسا نێودەوڵەتییە مرۆییەکان و ڕێککەوتننامەکانی ژنێف ناگرێت”، ناوبراو هۆشداریشی دا و گوتی: “ئیسرائیل دەیەوێت ئەوەی لە غەززە ئەنجامی دا، لە باشووری لوبنانیش دووبارەی بکاتەوە، ئەرکی دەسەڵاتدارانی وڵاتیشە ڕێگری لە دووبارەبوونەوەی ئەو کارەساتە بکەن.”
لە تەوەرێکی دیکەی قسەکانیدا، سەرۆککۆماری لوبنان پاراستنی ئاشتیی ناوخۆیی و پێکەوەژیانی بە “هێڵی سوور” ناوبرد و ڕایگەیاند، نانەوەی فیتنەی تائیفی و مەزهەبی تەنیا خزمەت بە بەرژەوەندییەکانی ئیسرائیل دەکات. جەختیشی کردەوە کە “هێزە ئەمنی و سەربازییەکان لەوپەڕی ئامادەییدان بۆ ڕووبەڕووبوونەوەی هەر کەسێک کە بیەوێت یاری بە ئاشتی و سەقامگیریی ناوخۆیی وڵات بکات.”