عامر خان، ئەستێرەی جیهانیی بۆڵیوود، لە چاوپێکەوتنێکی تەلەڤزیۆنیدا دان بەوەدا دەنێت کە دوای جیابوونەوەی لە هاوسەری یەکەمی، ڕینا دۆتا، تووشی بارودۆخێکی دەروونی زۆر خراپ بووە.
خان باس لەوە دەکات کە دوای ئەوەی ڕینا و دوو منداڵەکەی ماڵیان جێهێشت، ئەو هەستی بە تەنیاییەکی کوشندە کردووە و پەنای بۆ خواردنەوەی کحول برد. دەڵێت، بۆ ماوەی ساڵێک و نیو، بەردەوام ڕۆژانە نزیکەی بوتڵێکی تەواوی دەخواردەوە، کە ئەمەش خەریک بوو کاریگەرییەکی وێرانکەر لەسەر کارە هونەرییەکانی دابنێت.
پەیوەندی عامر خان و ڕینا لە 1986 دەستی پێکرد و بۆ ماوەی 16 ساڵ بەردەوام بوو، بەڵام لە کۆتاییدا بە جیابوونەوە کۆتایی هات.
دواتر لە 2005 لەگەڵ کیران ڕاو هاوسەرگیری کردەوە، بەڵام ئەوەش لە 2021 کۆتایی هات.
ئێستا عامر خان دەڵێت، قۆناغێکی نوێی لە ژیانی سۆزداریدا دەست پێکردووە و لەگەڵ گۆری سپرات پەیوەندی هەیە. ئەو جەخت دەکاتەوە کە داننان بە لاوازی و ڕووبەڕووبوونەوەی قەیرانەکان تەنیا ڕێگەیە بۆ چاکبوونەوە و دەستپێکردنەوەی ژیانێکی تەندروست.