سەرەڕای بەردەوامی گرژییەکانی گەرووی هورمز و گەمارۆ دەریاییەکان، نرخی نەوت لە بازاڕەکانی جیهاندا جۆرێک لە سەقامگیری بەخۆوە دەبینێت.
ئەمڕۆ یەکشەممە لە سەرەتای کردنەوەی بازاڕەکاندا نرخی نەوتی خاوی برێنت بە 105.03 دۆلار مامەڵەی پێوە دەکرێت، کە بەراورد بە دوێنێ 105.33 دۆلار دابەزینێکی کەمی بەخۆوە بینیوە و بە نزیکەیی لە هەمان ئاستدا ماوەتەوە.
هاوکات نرخی نەوتی سووکی تەکساس (WTI): دوای ئەوەی دوێنێ دابەزینێکی بەرچاوی بەخۆوە بینی، ئەمڕۆ نرخەکەی گەیشتە 94.40 دۆلار. ئەم نرخە بەراورد بە دوێنێ 94.4 دۆلار بە جێگیری ماوەتەوە، بەڵام نیشانەی وەستانی ئەو شەپۆلە دابەزینە دەردەخات کە دوێنێ روویدا.
کاریگەرییە سیاسی و ئابوورییەکان
بەردەوامی داخرانی تەنگەی هورمز وەک کارتێکی گوشار لە نێوان ئەمریکا و ئێران، هێشتا سێبەری بەسەر بازاڕەکاندا هێشتووەتەوە.
پەککەوتنی گواستنەوەی ئەو 20 ملیۆن بەرمیلەی کە پێشتر رۆژانە بەو گەرووەدا تێدەپەڕین، وایکردووە نرخەکان لە سەروو ئاستی 90 دۆلارەوە بمێننەوە، لەکاتێکدا هەردوولا چاوەڕێی رێککەوتنێکی نوێ دەکەن بۆ کەمکردنەوەی گوشارە ئابوورییەکان.