دوێنێ چوارشەممە بەرپرسێکی باڵای پێنتاگۆن ڕایگەیاند، له یەکەم خەمڵاندنی فەرمیی بۆ تێچووی سەربازیی جەنگی ئەمریکا لە دژی ئێران، تا ئێستا ٢٥ ملیار دۆلاری تێچووە.
جۆڵز هێرس، کە ئەرکی چاودێری دارایی (کۆمپتڕۆڵەر)ی پێنتاگۆن بەڕێوەدەبات، بە یاسادانەرانی لیژنەی هێزە چەکدارەکانی ئەنجومەنی نوێنەرانی ڕاگەیاند کە زۆربەی ئەو پارەیە بۆ دابینکردنی تەقەمەنی خەرج کراوە.
هێرس وردەکاریی ئەوەی نەخستە ڕوو کە ئایا ئەو خەمڵاندنە چ جۆرە تێچوویەکی گرتووەتەوە و ئایا تێچووی پێشبینیکراوی دووبارە بونیادنانەوە و چاککردنەوەی ژێرخانی بنکە سەربازییەکانی ڕۆژهەڵاتی ناوەڕاست دەگرێتەوە کە لە کاتی ململانێکاندا زیانیان بەرکەوتووە یان نا.
ئادەم سمیت، نوێنەری دیموکراتەکان و گەورە بەرپرسی لیژنەی هێزە چەکدارەکانی ئەنجومەنی نوێنەران، لە وەڵامی هێرسدا وتی: “خۆشحاڵم کە وەڵامی ئەو پرسیارەت دایەوە. چونکە ماوەیەکی زۆرە داوای دەکەین و کەس ئەو ژمارەیەی پێ نەدابووین.”
تێچووی ٢٥ ملیار دۆلار یەکسانە بە تەواوی بودجەی ساڵانەی ئاژانسی بۆشایی ئاسمانی ئەمریکا (ناسا).
بەڵام هێشتا ڕوون نییە پێنتاگۆن چۆن گەیشتووەتە بڕی ٢٥ ملیار دۆلار، بە لەبەرچاوگرتنی ئەوەی کە سەرچاوەیەک مانگی ڕابردوو بە ڕۆیتەرزی ڕاگەیاندبوو کە ئیدارەی سەرۆک دۆناڵد ترەمپ خەمڵاندنی کردووە کە تەنها شەش ڕۆژی یەکەمی جەنگەکە لانی کەم ١١.٣ ملیار دۆلاری لەسەر ئەمریکا کەوتووە.