بەپێی نوێترین داتاکانی بەڕێوەبەرایەتی ئاماری کشتوکاڵی لە عێراق، نرخی تێکڕای زۆربەی بەرهەمە کشتوکاڵییەکان لە ساڵی 2025دا بەراورد بە ساڵی 2024 بەرزبوونەوەی بەخۆیەوە بینیوە. ئەم گۆڕانکارییانە بۆ کاریگەرییەکانی هەڵئاوسانی ناوخۆیی، گۆڕانی نرخی ئاڵوگۆڕی دۆلار و زیادبوونی هاوردەکردن دەگەڕێتەوە.
بەپێی شیکردنەوەی داتاکان، نرخی بەروبوومە کێڵگەییەکان زیادی کردووە؛ بە جۆرێک نرخی گەنم بە ڕێژەی 4.9% بەرزبووەتەوە و گەیشتووەتە 510 دینار بۆ هەر کیلۆیەک. هەروەها نرخی برنجی چاکنەکراو 4.4% و جۆ 3.8% گران بوون. لە کەرتی سەوزەواتیشدا، نرخی بامیە 3.6% و تەماتە 1.9% بەرزبوونەوەیان تۆمارکردووە.
لە بازاڕی میوەدا، نرخی لیمۆی ترش بە ڕێژەی 3% زیادیکردووە و گەیشتووەتە 3034 دینار بۆ هەر کیلۆیەک. هەنار و قۆخ بە ڕێژەی کەمتر لە 1% گران بوون، لە بەرامبەردا نرخی سێو و زەیتوون دابەزینی بەخۆیەوە بینیوە. سەبارەت بە خورماش، جۆری “بەرحی” 3% و جۆری “مەکتووم” 3.2% نرخەکانیان زیادی کردووە.
ئامارەکان ئاماژە بەوە دەکەن کە نرخی گۆشتی سوور بەردەوامە لە بەرزبوونەوە؛ گۆشتی بەرخ 3.2% و گۆشتی مانگا 3.1% گرانتر بوون. بەڵام بە پێچەوانەی بەرهەمەکانی دیکە، نرخی مریشک بە ڕێژەی 7.2% دابەزیوە و نرخەکەی گەیشتووەتە 2900 دینار بۆ هەر کیلۆیەک.