ئاژانسی نیشتمانیی هەواڵی لوبنان ڕۆژی یەکشەممە ٣ی جۆزەردان ڕای گەیاند ئەو “کوشتارەی” ئێوارەی شەموو ئیسرائیل لە گوندی “سەیرولغەربیە” لە شارۆچکەی نەبتیە ئەنجامی دا، بووە هۆی کوژرانی ٩ هاووڵاتی کە منداڵێک و چەند ژنێکیان لەنێودایە.
ئاژانسەکە گوتیشی هێزەکانی بەرگریی شارستانیی لوبنان بەدرێژایی شەو سەرقاڵی لادانی داروپەردووی باڵەخانەیەکی سێ نهۆمی لە گەڕەکی “زوهوور” بوون کە بە تەواوی وێران کراوە. لەوێدا تەرمی ٩ کوژراو کە ٦یان ژن بوون لەژێر داروپەردوو دەرهێنران و ٧ برینداریش بۆ نەخۆشخانەکانی نەبتیە گوازرانەوە.
بەگوێرەی ڕاپۆرتەکە، هێرشی ئاسمانی بۆ سەر گوندی “تەورا” لە شارۆچکەی سوور ئێوارەی شەموو کوژراوێک و ٢ برینداری لێ کەوتەوە. هەروەها هێرش بۆ سەر گوندی “بازووریە” بووە هۆی کوژرانی کەسێک و برینداربوونی ٢ کەسی دیکە.
ژمارەی قوربانیانی خولی نوێی تێکهەڵچوونەکانی نێوان ئیسرائیل و حیزبوڵڵا لە ٣٠٠٠ کەس تێپەڕی. ئەمە لە کاتێکدایە هەفتەی ڕابردوو ئاگربەستی ژێر چاودێریی ئەمریکا بۆ ٤٥ ڕۆژی دیکە درێژ کرایەوە.
