سەرچاوەیەکی ئەمنی ڕایگەیاند کە لە ئامارێکی سەرەتاییدا سێ چەکداری ڕێکخراوی داعش لە ئەنجامی ئۆپراسیۆنێکی سەربازیی دەزگای دژەتیرۆری عێراق لە دەوروبەری ناحیەی “بەشیر” لە باشووری پارێزگای کەرکووک کوژراون.
به گوتەی سەرچاوەکه، “هێزەکانی دژەتیرۆر بەرەبەیانی ئەمڕۆ، لەسەر بنەمای زانیاریی هەواڵگریی ورد، هەڵمەتێکی بەرفراوانی پشکنینیان لە ناوچەی (یەرغون)ی سەر بە ناحیەی تازەخورماتوو دەستپێکرد دوای دڵنیابوونەوە لە بوونی شانەکانی داعش لەو شوێنەدا.”
سەرچاوەکه گوتی: “لە کاتی جێبەجێکردنی ئەرکەکەدا، تەقەیەکی زۆر لە هێزەکانی دژەتیرۆر کراوە و لە ئەنجامی پێکدادانی چەکداری نێوان هەردوولادا، سێ تیرۆریستەکە کوژراون.”
سەرچاوەکە ئاماژەی بەوە کردووە کە ئۆپراسیۆنەکە تا ئێستاش بەردەوامە و هێزە ئەمنییەکان خەریکی کێوماڵکردنی ناوچەکەن بۆ ڕاوەدووڕانی چەکدارەکانی تری داعش، ئەمەش هاوکاتە لەگەڵ بڵاوبوونەوەی چڕی هێزەکان و دابینکردنی پشتگیریی ئاسمانی لە لایەن فڕۆکەوانی سوپاوە.