بەرپرسانی تەندروستی لە غەززە دەڵێن لانی کەم ١٠ فەلەستینی لە هێرشە ئاسمانییەکان و تەقەی هێزەکانی ئیسرائیلدا لە چەند هێرشێکی جیاوازدا کوژراون.
تۆڕی جەزیرە دەڵێت ئەحمەد وەشاحی یەکێک لە ڕۆژنامەنووسانی ئەو تۆڕە، لە هێرشی ئاسمانیی ئیسرائیلدا بۆ سەر ماڵێک لە کەمپی پەنابەران لە ناوەڕاستی غەززە کوژراوە. سوپای ئیسرائیل بانگەشەی ئەوە دەکات ئەو ڕۆژنامەنووسە ئەندامی حەماس بووە، بەڵام پێشتر جەزیرە ئەو تۆمەتانەی ڕەت کردووەتەوە.
لە هێرشێکی دیکەدا، چوار کەس لەوانە ژنێک و دوو منداڵ لە باڵەخانەیەکی نیشتەجێبوون لە شاری غەززە کوژران. سوپای ئیسرائیل دەڵێت لەو هێرشەدا یەکێک لە چەکدارەکانی کردووەتە ئامانج.
ئاگربەستێکی لەرزۆک لە تشرینی یەکەمی ڕابردوودا کۆتایی بە شەڕە بەرفراوانەکانی نێوان حەماس و ئیسرائیل هێنا؛ بەڵام بەڕێوەبەرایەتیی تەندروستیی غەززە، لەلایەن حەماسەوە بەڕێوە دەبرێت، دەڵێت لەو کاتەوە تا ئێستا زیاتر لە هەزار فەلەستینی بە گوللەی ئیسرائیل کوژراون.