ئەستێرەی جیهانی، كاتی پێری، بە فەرمی وادەی بڵاوکردنەوەی نوێترین گۆرانی خۆی بە ناوی «Watch It Burn» ڕاگەیاند، کە بڕیارە لە ٢٥ی حوزەیرانی ٢٠٢٦ لەسەر ئاستی جیهان بڵاوبکرێتەوە.
ئەم بەرهەمە دەبێتە یەکەم هەنگاو و دەستپێکی ئەلبوومی داهاتووی کە هەوادارانی بە پەرۆشەوە چاوەڕوانی دەکەن و لە ئێستادا بە ناوی کاتیی (KP7) ناسراوە.
پێری لە ڕێگەی هەژماری فەرمی خۆی لە تۆڕی کۆمەڵایەتی «ئینستاگرام»، پۆستەری فەرمی گۆرانییەکەی بڵاوکردەوە.
دیزاینی پۆستەرەکە بە وێنەیەکی نزیک (Close-up) لە ڕوخساری ئەو دەرکەوتووە، کە بە ڕووناکی مۆم یان تیشکێکی گەرم داگیرساوە و دڵۆپە ئاو بەسەر پێستیدا دێنە خوارەوە؛ ئەمەش دیمەنێکی دراماتیکی جیاوازی پێبەخشیوە کە لە کارەکانی پێشووی ناچێت.
شێوازی وێنەکە و سەرنجخستنە سەر وردەکارییەکان، ئاماژەیەکی ڕوونن بۆ ئەو کەشوهەوا ناوەکی و قووڵەی کە لە دەقی گۆرانییەکەدا هەیە.
لە لێدوانێکی تایبەتدا بۆ گۆڤاری بەناوبانگی (People)، كاتی پێری ئاماژەی بەوە کردووە کە بیرۆکەی ئەم گۆرانییە لە بۆشاییەوە نەهاتووە، بەڵکو ئیلهامی لە ساڵێکی سەخت و پڕ لە تەحەدا و ڕووداوی دژوار وەرگرتووە کە لەم دواییانەدا لە ژیانی تایبەتی خۆیدا پێیدا تێپەڕیوە.
کات پێری لە درێژەی قسەکانیدا گوتی:
«گۆرانی “Watch It Burn” گوزارشت لە چەمکی ڕووبەڕووبوونەوەی ئازار و بارودۆخی سەخت دەکات، پاشان سەرلەنوێ هەستانەوە و هەنگاو نان بەرەو قۆناغێکی ڕوونتر و جێگیرتر لە ژیاندا.»
ئەم کەشە پڕ لە هیوا و خۆڕاگرییە، لەو کورتە ڤیدیۆ تۆرۆژێنەرانەشدا (Teasers) بەدی دەکرێت کە بۆ هەوادارانی بڵاوی کردوونەتەوە.