لە مۆندیالی 2026دا، یاسایەکی نوێ بۆ پشووی نێوان گێمەکان جێگیر کراوە، بە جۆرێک لە ناوەڕاستی هەر گێمێکدا پشوویەکی سێ خولەکی بەبێ گوێدانە پلەی گەرما دەدرێت. ئەم بڕیارە لە کاتێکدا وەک دەرفەتێکی زێڕین بۆ سپۆنسەرەکان و کەناڵەکانی پەخش دەبینرێت تا ڕیکلامی زیاتر پەخش بکەن، لە هەمان کاتدا ناڕەزایەتی و مشتومڕی زۆری لە ناوەندە وەرزشییەکاندا دروست کردووە.
کاریگەرییە تاکتیکییەکانی ئەم پشووانە بە ڕوونی لە ڕەوتی یارییەکاندا ڕەنگیداوەتەوە. بۆ نموونە، سێرگی باربارێزی ڕاهێنەری بۆسنە نیگەرانی خۆی دەربڕی کە ئەم وەستانە کۆنتڕۆڵ و ڕیتمی تیپەکەی تێکداوە. لە بەرامبەردا، موراد یاکینی ڕاهێنەری سویسرا بە شێوازێکی ستراتیژی سوودی لێ بینی و بە ئەنجامدانی گۆڕانکاری لە ڕێگەی یۆهان مانزامبی و ڕوبێن ڤارگاسەوە، ڕەوتی یارییەکەی بە سوودی خۆی گۆڕی.
لە لایەکی دیکەشەوە، مانوێل ئاکانجی بەرگریکاری سویسرا ڕەخنەی لە درێژی ئەم کاتە گرت و جەختی کردەوە کە یەک خولەک بەس بوو، چونکە ئەم ماوە درێژە زیان بەو تیپانە دەگەیەنێت کە باڵادەستن و پێویستیان بە بەردەوامییە لە ئاستەکەیاندا.
لە کۆتاییدا، شیکارییەکی ڕۆژنامەی “ئەتلەتیک” بۆ 24 یاری یەکەمی پاڵەوانێتییەکە، ڕاستییەکی تاڵ دەردەخات. لە کۆی 48 پشووی دیاریکراو، تەنها 14 حاڵەتیان گۆڕانکاری ڕاستەقینەیان لە ئەنجام یان ڕەوتی یارییەکەدا دروست کردووە. ئەم داتایەش بەڵگەیەکی بەهێزە بۆ ئەوەی کە لایەنی بازرگانی و قازانجی دارایی، نەک لایەنی هونەری و تەندروستی، گەورەترین براوەی ئەم یاسایەی مۆندیالی ئەمساڵە.